Ekologıa jáne tabıǵı resýrstar mınıstri Erlan Nysanbaev kıikterdi kórshi elderge kóshirýdiń yqtımal joldary týraly aıtyp berdi. Onyń aıtýynsha, janýarlardy kóshirýdiń túrli tásilderi bar jáne bul másele ǵylymı turǵydan muqıat qarastyrýdy talap etedi.

– Kıikterdi kóshirý – kúrdeli proses. National Geographic sıaqty uıymdar janýarlardy olardyń tarıhı mekenderine qaıta ornalastyrý týraly jobalardy jıi kórsetedi. Ádette iri janýarlar arnaıy konteınerler arqyly tasymaldanady. Al kıik usaq tuıaqty janýarlarǵa jatady, sondyqtan ony kóshirýdiń ózindik erekshelikteri bar. Qazir ǵalymdarmen birlesip osy baǵytta jumys istep jatyrmyz. Ázirge naqty usynystar ázirlengen joq. Árıne, kıikti jaı ǵana aıdap apara almaımyz – ony kólikpen tasymaldaý kerek. Bul rette janýardyń densaýlyǵyna zıan keltirmeı, aman-esen jetkizý basty nazarda bolady. Kólikpen jetkizýdiń de birneshe tásili qarastyrylyp jatyr, – dedi mınıstr úkimet otyrysynan keıin ótken brıfıńte.

Aıta keteıik, buǵan deıin Qazaqstan Prezıdenti Qasym-Jomart Toqaev Qytaıǵa 1,5 myń kıik berý jospary bar ekenin málimdegen bolatyn.