300 myńnan astam azamat zardap shekti: Qarjy monıtorıńi agenttigi zańsyz MQU-larǵa qatysty eskertý jasady
Qarjy monıtorıńi agenttigi 2025 jyldyń basynan beri zańsyz áreket etken 5 mıkroqarjy uıymynyń qyzmetin toqtatqanyn habarlady. Bul uıymdardan 300 myńnan astam azamat zardap shekken. Agenttiktiń málimetinshe, olardyń jalpy artyq tólem somasy 71 mlrd teńgeden asqan.
Zańsyz mıkroqarjy uıymdary óz qyzmetin zańdy nesıeleý túrinde kórsetkenimen, is júzinde qaryz alýshylarǵa zańsyz qosymsha tólemder, joǵary paıyzdar men saqtandyrý jarnalaryn mindettegen. Bul tásilder syıaqy mólsherlemesine zańmen belgilengen shekteýlerdi aınalyp ótýge múmkindik bergen.
Nátıjesinde azamattar nesıeni birneshe ese artyq tóleýge májbúr bolyp, qarjylyq qıyndyqqa tap bolǵan. Agenttik osyndaı táýekelderge jol bermeý úshin halyqty qaryz sharttarymen muqıat tanysýǵa shaqyrdy.
— Qaryz almas buryn onyń barlyq sharttaryn muqıat oqyp, túsinip alyńyz. Árbir azamat qandaı tólemdi ne úshin jasaıtynyn bilýge quqyly. Zańdy mıkroqarjy uıymdary "tekserýsiz" nemese "bárine beriledi" degen ýádelermen jumys istemeıdi, – delingen agenttik habarlamasynda.
Sonymen qatar agenttik birneshe mıkroqarjy uıymdarynyń lısenzıalaryn úsh aı merzimge toqtatqan. Olar:
-
MQU "Hava Finance" JSHS
-
MQU "POS Credit" JSHS
-
MQU "SF Offline" JSHS
-
MQU "Salem Kredıt" JSHS
Bul uıymdarǵa jańa mıkrokredıtter berýge, sharttardy uzartýǵa nemese boryshkerlerge qosymsha júkteme arttyrýǵa tyıym salyndy. Alaıda olar burynǵy kelisimsharttar boıynsha óz mindettemelerin tolyq oryndaýy tıis. Agenttik azamattardyń mıkrokredıtterin óteýdi jalǵastyrýy qajet ekenin de eske saldy.
