Astanada Kishi Taldykólde jergilikti turǵyndar óz kúshterimen tegin muz aıdynyn ashty. Qarapaıym bastama qala ekologıasy men jer saıasaty tóńiregindegi daýǵa nazardy qaıta aýdartty.
«Halyqtyq» aıdyn qalaı jasaldy
Kórshi turǵyn úı keshenderiniń turǵyndary altynshy qys qatarynan muzdy qardan tazartyp, aıdyndy tegistep júr. Qardy kúrekpen ysyryp, kónkı tebýge qaýipsiz alań jasap júr.
Jumys erikti túrde atqarylady, qaýipsizdikke erekshe mán beriledi. Degenmen bul resmı katok emes, sondyqtan muzdyń qalyńdyǵyna aýa raıy men kelýshilerdiń saqtyǵy tikeleı áser etedi.
Prosestiń vıdeosyn SOS Taldykol qaýymdastyǵy Instagram-da jarıalady.
Daýly kóldiń taǵdyry
Kishi Taldykól tóńiregindegi pikirtalas birneshe jyl boıy tolastamaı keledi. Kóldi qurǵatý jáne ishinara kómý jumystary júrip, aýmaqty Astananyń bas josparyna qurylys aımaǵy retinde engizdi bılik. Bul sheshimge tabıǵı aýmaqty saqtaýdy talap etken ekobelsendiler men qala turǵyndary qarsy shyǵyp júr.
Ákimdiktiń ýádesi
Taldykól mańynda ekopark salýdy 2026 jyly bastaımyz dedi OKQ brıfıńinde Astana ákimi Jeńis Qasymbek. Keıbir nysandardy 2027 jylǵa shegerýimiz múmkin dedi ol.
Qaýipsizdik eskertpesi
Qaýymdastyq bul aıdynnyń beıresmı ekenin eskertip, muzdyń qalyńdyǵyn tekserip shyǵýǵa, balalardy qaraýsyz qaldyrmaýǵa jáne aýa raıyn muqıat baqylaýǵa shaqyrady.
Ne kútedi jurt
Osy «halyqtyq» katok arqyly Kishi Taldykól máselesine qoǵamnyń nazaryn únemi baǵyttaýdy qalaıdy turǵyndar. Kóldi demalys aımaǵy retinde saqtap, jazda da, qysta da qaýipsiz serýendeıtin keńistik qurylǵanyn kútedi olar.
Bul týraly Qamshy.kz aqparat agenttigi habarlaıdy.
