Reseı Ýkraınada arnaıy áskerı operasıa bastaǵaly 3 jyldan asa ýaqyt ótti. Osy oralyqta álemdik jáne aımaqtyq geosaıası jaǵdaı túrlenip, qundylyqtar tolyq jańardy deýge negiz bar. Aýmaly-tókpeli kezeńde jasyryn agentter men túrli saıası maqsatty kózdeıtin uıymdardyń qyzmeti de qyza túsetinin tarıh betterindegi jaǵdaılardan bilemiz.
Azattyq TV YouTube arnasynda «Qazaqstanda Reseı agentteri qalaı jumys isteıdi? Qupıa qujattarǵa sholý» degen taqyryppen 18 mınýttyq beınematerıal jarıalandy. Materıalda Qazaqstanda jumys isteıtin reseılik agentterdiń baıandamalary sıpatyndaǵy qujattar týraly aıtylyp, mátinderine taldaý jasalady.
Beınematerıaldaǵy aqparatqa súıensek, «Dose» zertteý ortalyǵy joldaǵan qujattarda Qazaqstan terıtorıasynda túrli maqsatta jumys isteıtin jasyryn agentterdiń RF Bas barlaý basqarmasynyń polkovnıgi Denıs Smolánınovke joldaǵan esebi týraly aıtylǵan.
Materıalǵa negiz bolǵan qujattardyń mazmuny Ýkraınadaǵy arnaıy áskerı operasıa bastalǵannan keıin Qazaqstannyń Reseıge qatysty syrtqy saıasattaǵy ustanymy, ishki saıasattaǵy dıskýrs, jalpy saıası rıtorıka ózgerdi degenge saıady.
Shyǵarylymda kórsetilgen qujattyń keıbir bólikteriniń sýretterinde «Qazaqstannyń soltústik óńirlerindegi áskerı daıyndyqtyń kúsheıýi», «Qazaqstanda jáne Ortalyq Azıada turatyn ulty orys azamattardyń quqyqtary men qyzyǵýshylyqtaryn qorǵaıtyn arnaıy baǵdarlama ázirleý», «Aqparattyq jáne mádenı is-sharalardy qoldaý, aqparat quraldarynyń jumysyn josparlaý» baǵytyndaǵy sózder jazylǵan.
Azattyq redaksıasy atalǵan qujattarda aıtylǵan aqparat boıynsha QR Syrtqy ister mınıstrligine saýal joldaǵan. Bul máselelerdiń naqty sıpaty syrtqy saıasat pen elaralyq baılanysqa jaýapty vedomstvonyń jaýabynan belgili bolmaq.
Arandatý men jalǵan aqparat taratý órship turǵan kezde sapaly qoǵamnyń basty tártibi – resmı aqparatqa ǵana sený. Sondyqtan, atalǵan materıaldardyń mazmunyna ǵana ıek artpaı, eldiń ishine iritki salýy yqtımal jaǵdaılarǵa qatysty SİM jaýabyn kútken durys.
