Astanadaǵy LRT dińgekterin óner nysandaryna aınaldyrý týraly usynys jelide rezonans týdyrdy. Ideıa ádemi estilgenimen, qaýipsizdik pen shyǵyn máselesin CTS bólek atap ótti.
Usynys qalaı paıda boldy
Threads jelisinde áldebir qoldanýshylar estakada astyn «qalalyq galereıaǵa» aınaldyrýdy usyndy. Biri alǵashqy dińgekke «ortalyq» músin qoıýdy, ár on dińgekten batyrlar beınesin berýdi aıtty. Ýaqyt óte bul tutas tarıhı alańǵa aınalýy múmkin dedi ıdeıa avtorlary.
Basqalar «artyq bezendirýdiń» qajeti joq dedi. Qarapaıym, qaýipsiz jaryqtandyrýdy ornatsaq jetkilikti dedi qoldaýshylar.
Qoǵam pikiri nege ekige bólindi
Qoldaıtyndar beton massıvin qala mádenıetiniń jańa núktesine aınaldyrýǵa bolady dedi. Qarsy tarap júrgizýshilerdiń nazaryn alańdatý, boıaýdyń tozýy, kútimge ketetin turaqty shyǵyndar kóbeıedi dep eskertti. Qarjyny ınfraqurylymnyń ózine jumsaý durys bolady dedi synshylar.
CTS ustanymy
Redaksıa suraýyna jaýap bergen CTS ókilderi estakada men dińgekterde tek fýnksıonal jaryq qarastyrylǵanyn aıtty. Kez kelgen qosymsha elementti ornatý úshin jeke tehnıkalyq saraptama, qaýipsizdik talaptaryna saı kelisimder jáne paıdalaný men konstrýksıanyń saqtalýyna qatysty qujattar qajet bolady dedi kompanıa.
«Qaýipsizdik, paıdalaný jáne konstrýksıa tutastyǵy talaptaryn eskermeı ózgerister engizilmeıdi», – dep túsindirdi CTS.
LRT qashan tolyq iske qosylady
Astanada 29 qyrkúıekte LRT jelisi synaq rejıminde júre bastady. Synaq kezeńi keminde alty aı jalǵasady dep habarlanǵan. Jobany 2026 jyly paıdalanýǵa berý josparlanyp otyr.
Bul týraly Qamshy.kz aqparat agenttigi habarlaıdy.
