Qazirgi álemde, jahandaný dáýirinde jastar aqparattyń kóp bóligin áleýmettik jeliler men ınternet arqyly alady. Ókinishke oraı, keıbir teris nıetti toptar jastardy radıkaldy ıdeıalarǵa tartýǵa tyrysady. Olar dindi burmalap túsindiredi jáne qoǵamda alaýyzdyq týdyrýǵa tyrysady. Mundaı qaýipterdiń aldyn alý úshin jastardyń dinı saýattylyǵyn arttyrý, dástúrli rýhanı qundylyqtardy nasıhattaý jáne synı oılaýdy damytý óte mańyzdy.
Osyǵan baılanysty bizdiń jastar toleranttylyq pen konfesıaaralyq kelisim qazirgi beıbit qoǵamnyń basty qundylyqtarynyń biri ekenin túsinýi kerek. Álemde ártúrli ulttar men dinderdiń ókilderi turady. Olardyń ózara qurmeti, túsinistigi men kelisimi memlekettiń turaqtylyǵy men qoǵamnyń damýyna tikeleı áser etedi. Sondyqtan toleranttylyq mádenıetin qalyptastyrý jáne konfesıaaralyq kelisimdi nyǵaıtý árbir azamattyń mańyzdy mindeti bolyp sanalady.
Toleranttylyq – bul basqalardyń pikirine, mádenıetine, tiline jáne dinı senimderine qurmetpen qaraý. Bul sizdiń dinińizden nemese prınsıpterińizden bas tartýdy bildirmeıdi, kerisinshe basqalardyń senimi men pikirine qurmet kórsetýdi bildiredi. Tolerantty qoǵamda adamdar bir-birin tómendetpeıdi jáne ortaq qundylyqtardy joǵary baǵalaıdy. Mundaı qoǵamda turaqtylyq, ózara senim jáne azamattyq birlik nyǵaıady.
Qazaqstan – kóptegen etnostar men túrli dinı birlestikterdiń ókilderi kelisimde ómir súretin memleket. Bizdiń elde zań ıslam, pravoslavıe, katolısızm, protestanttyq aǵymdar, ıýdaızm, býddızm jáne basqa da konfesıalardyń qyzmetine jaǵdaı jasady. Memleket árbir azamatqa ar-ojdan men dinı senim bostandyǵyna kepildik beredi. Sonymen qatar, dinı kelispeýshiliktiń aldyn alý jáne qoǵamdyq kelisimdi saqtaý memlekettik saıasattyń mańyzdy baǵyttary bolyp tabylady.
Konfesıaaralyq kelisim – bul ózara qurmet pen túsinistikke negizdelgen ártúrli dinı birlestikterdiń ómiri. Mundaı kelisim qoǵamda dinı negizde janjaldardyń týyndaýyna jol bermeıdi. Árbir din adamdy jaqsylyq, meıirimdilik, ádildik pen adamgershilikke shaqyrady. Sondyqtan ártúrli konfesıalar ókilderiniń ortaq maqsattar boıynsha birlesken jumysy qoǵamnyń damýyna oń áser etedi.Qazaqstanda konfesıaaralyq kelisimdi nyǵaıtý boıynsha úlken jumys júrgizilýde. Túrli deńgeıdegi kezdesýler, dóńgelek ústelder, ǵylymı konferensıalar men aǵartýshylyq is-sharalar uıymdastyrylady. Bul sharalar ártúrli dinı birlestikter arasyndaǵy ózara senimdilikti arttyrady jáne qoǵamdaǵy kelisimdi saqtaýǵa yqpal etedi. Sondaı-aq, bilim berý mekemelerinde toleranttylyqty, patrıotızmdi jáne adamgershilik qundylyqtardy nasıhattaýǵa erekshe kóńil bólinedi.
Toleranttyq pen konfesıaaralyq kelisim ár azamattyń kúndelikti ómirinen bastalady. Adam basqa adamdardyń pikiri men senimine qurmetpen qarap, arazdyqty emes, kelisim men birlikti nasıhattaýy kerek. Ózara syılastyq, jaýapkershilik jáne zańdy qurmetteý qoǵamdaǵy turaqtylyqtyń berik negizi bolyp tabylady.Qorytyndylaı kele, toleranttylyq pen konfesıaaralyq kelisim — Qazaqstannyń basty jetistikteriniń biri. Olardy saqtaý jáne nyǵaıtý — memleket pen qoǵamnyń ǵana emes, árbir azamattyń ortaq mindeti. Birlik pen kelisim ústemdik etetin elde ǵana turaqty damý, beıbit ómir jáne jarqyn bolashaq múmkin. Sondyqtan toleranttylyq mádenıetin qalyptastyrý jáne konfesıaaralyq kelisimdi nyǵaıtý-bizdiń ortaq maqsatymyz.
