22 aqpan kúni Jer betinde Ragnárók (Ragnarök) bolýy múmkin. German-skandınav mıfologıasynda bul qudaılar men búkil álemniń ólimi dep atalady. Bul kúni Fenrır dep atalatyn alyp qasqyr Kúndi jutyp, álem túnekte qalady dep senedi Eýropa halqy.

Ańyzda aıtylǵandaı, aqyrzaman aldynda úsh jyl qatarynan qys kúshine minip, shekaralar joıylady. Sonymen qatar, uly soǵys bolyp, Odın, Tor jáne Freır qudaılary qaza tabady. Eń sońynda jalǵyz erkek pen áıel ǵana qalady jáne olar adamzat ómirin odan ári jalǵaıtyn bolady delingen osynaý ańyzda. Anglıanyń soltústigindegi Iork qalasynda vıkıngter jyl saıyn osy kúndi merekeleıdi. Eger 22 aqpanǵa deıin qys aıaqtalmasa onda Ragnarók oryn alýy múmkin dep senedi olar. Osy aptanyń senbisinde 300-ge jýyq vıkıng ózderiniń ulttyq kıimderin kıip, Iork kóshelerimen júrip ótpek. Al, vıkıngterdiń tarıhy men mádenıetin zertteıtin norvegıalyq ortalyq jetekshisi Danıel Daglan ańyzdyń astarynda shyndyqtyń jatqanyn aıtyp otyr. "Aqyrzamannyń ornaýy ekitalaı, árıne. Alaıda, shekaralardyń joıylýy bolyp jatyr. Ony tikeleı túsinýge bolmaıdy. Mysal retinde ınternetti alýǵa bolady. Ol barlyq shekarany buzdy" deıdi ǵalym.