Ótken 12 aıdyń ishinde Astana qalasyndaǵy AITV (adamdaǵy ımmýn tapshylyǵy vırýsy) ınfeksıasyna shaldyqqandardyń sany 129 adamǵa ósti. Bul týraly Astana qalalyq «JITS-nyń aldyn alý jáne oǵan qarsy kúres ortalyǵy» MKQK baspasóz qyzmeti habarlady.
Málimdemede keltirilgendeı, bul kórsetkish sońǵy jyldarmen salystarǵanda 30 paıyzǵa kóp. Búginde Astana qalasynda 710 jaǵdaı tirkelgen. Onyń ishinde AITV juqtyrǵandardyń basym kópshiligin, ıaǵnı 38,4%-yn (273 adam) ıneksıalyq esirtkini qoldanatyndar, sonyń ishinde bas bostandyǵynan aıyrylyp, jazasyn óteýshiler qurasa, 53,5%-yn (380 adam) kezdeısoq jynystyq qatynasqa túsetinder, 7,8%-yn basqa jolmen juqtyrǵandar qurap otyr.
«Budan aýrýdyń jynystyq qatynas arqyly berilý joly 2012-2013 jyldary 60 paıyzǵa jetkendigin kórýge bolady. Al jas shamalaryna keler bolsaq keıingi jyldary AITV juqtyrǵandardyń 77 paıyzy eńbek jasyndaǵy ıaǵnı 20-39 jas arasyndaǵy qyrshyn jastar. Bul kórsetkishter eshkimdi beı-jaı qaldyrmasy anyq. Ásirese sala mamandary qaterli derttiń aldyn alý maqsatynda tynymsyz kúresýde», - delingen habarlamada.
Astana qalasy «JITS-nyń aldyn alý jáne oǵan qarsy kúres ortalyǵy» MKQK búgingi kúni Halyqaralyq eńbek uıymynyń (HEU) jáne Jahandyq básekelestik ındeksiniń kórsetkishin jaqsartý máselelerin iske asyrý aıasynda Astana qalasynda óndiris oryndarynda jáne shaǵyn jáne orta bıznes qurylymdarda AITV juqpasynyń aldyn alýǵa arnalǵan oqý baǵdarlamasyn engizdi. Atalǵan óndirister men bıznes qurylymdaryna JITS ortalyǵy mamandarynyń qatysýymen arnaıy semınarlar júrgizildi. Atap aıtqanda, qaladaǵy barlyq vedomstvolarda, oqý oryndarynda, medısınalyq mekemelerde sondaı-aq óndiris, saýda jáne t.b oryndarda barlyǵy 985 is-shara júrgizildi. Shara aıasynda 77863 adam qamtylyp, qajetti málimetpen tanystyryldy.
«Sondaı-aq aýrýdyń aldyn alý, saqtaný joldarymen tanystyrý jaıynda keńinen aqparat berý úshin BAQ-tyń úlesi basym ekendigin eskere otyryp, JITS ortalyǵynyń tapsyrysy boıynsha 4 beınerolık memlekettik jáne orys tilderinde jasalyp, birneshe telearnalarda kórsetildi», - deıdi JITS ortalyǵy uıymdastyrý bóliminiń meńgerýshisiE.Momynbekov.
