Elimizdegi tórtinshi munaı óńdeý zaýytyn Mańǵystaý oblysynda salǵan oryndy. Búgin Parlament Senatynyń jalpy otyrysynda Úkimet basshysynyń atyna saýal joldaǵan depýtat Mıhaıl Bortnık osy máseleni kóterdi.

«Mańǵystaý jurtshylyǵy Elbasynyń tórtinshi munaı óńdeý zaýytyn salý týraly usynysyn zor yqylaspen qabyldaıdy jáne bul kásiporynnyń dál Mańǵystaý oblysy aýmaǵynda bolýy kerektigin oryndy sanaıdy. Halyqtyń bastamasyn qoldaı otyryp, bundaı sheshimge ońtaıly dálelderdi alǵa tartamyz», – deı kele depýtat M. Bortnık birqatar mysaldar keltirdi.

Onyń aıtýynsha, Mańǵystaý óńiriniń ekonomıkasy negizinen kómirsýtek shıkizattaryn óndirýge táýeldi. Bul saladaǵy óndiris  2013 jyly 18 mln. tonnadan asty. Al barlanǵan ken oryndaryndaǵy qorlar 3,5 mlrd tonnany quraǵan. Budan bólek, aldaǵy ýaqytta teńiz ken oryndaryn ıgerý josparlanady. Al qalyptasqan shıkizat bazasy munaı óńdeý zaýytynyń úzdiksiz jumysyn qamtamasyz etýge jetedi. Buden bólek, senatordyń pikirinshe, «Jeqazǵan-Beıneý», «Jańa Ózen-Túrkimenstan-Iran-parsy shyǵanaǵynyń shekarasy» sekildi kóliktik-logıstıkalyq júıeniń belsendi túrde júzege asýy, teńiz porttarynyń qýatyn arttyrý sharalary óndirilgen ónimdi ishki ǵana emes, syrtqy naryqqa shyǵarýdy qamtamasyz ete alady.

«Munaı óńdeý zaýytynyń qurylysy Mańǵystaý oblysynyń ekonomıkasyn ártaraptandyrýǵa de septigin tıgizer edi. Jańa jumys oryndary qurylady, bilikti eńbek resýrstary tartylady. Toqtala ketetin taǵy bir ózekti jaıt, 1990-jyldardyń basynda Mańǵystaý oblysynyń aýmaǵynda osyndaı kásiporyn qurylysy bastalyp, biraq ókinishke qaraı aıaqtalmaǵan bolatyn. Degenmen, osynyń nátıjesinde temirjol, avtokólik joldary, qubyr jáne elektr jelileri sekildi ınfraqurylymdar qalyptasqan edi», – deıdi M. Bortnık.

Osyǵan oraı, depýtat jańa munaı zaýyty salynatyn oryndy anyqtaýda bul faktiler qaperge alynsa degen tilegin jetkizdi.

QazAqparat