Saıasattanýshylar men bilikti sarapshylar bılik pen qarasha halyqtyń arasy alshaqtap ketkenin jıi aıtady. Shynynda da qarapaıym halyqtyń bılikte, al bıliktiń halyqta sharýasy joq. Muny, kúni keshe, Úkimet múshelerimen kezdesken memleket basshysy Nursultan Nazarbaevta aıtty. Prezıdenttiń oıynsha atqaminerler daǵdarys pen qymbatshylyq týraly elge qarapaıym tilmen, durystap túsindirý jumystaryn júrgizý kerek. Alaıda, baqytty basshylar baqytsyz halqynyń taǵdyryna bas qatyryp otyrǵan joq.
Memleket basshysy Nursultan Nazarbaev Kárim Másimov basqaratyn Mınıstrler kabınetiniń múshelerin Aqordada qabyldap, elimizdiń ekonomıkalyq jaǵdaıyn talqylady. Prezıdenttiń alqaly jıyn ótkizip, atqaminerlerge aýyr mindet artqanyna qarap áleýmettik jaǵdaımyzdyń máz emes ekendigin anyq ańǵarýǵa bolady. Alaıda, bizdiń keıbir basshylar ózderiniń jaǵdaıy jaqsy bolǵanǵa qarap «bári keremet» dep oılaıtyn bolsa kerek. Máselen prezıdent Mádenıet jáne Sport mınıstri Arystanbek Muhamedıulyna:
– Kúni keshe Qazaq handyǵynyń 550 jyldyǵyn atap óttik qoı. Arystanbek, aıtyńdarshy, 550 jyldyń ishinde, qazaq dál osylaı bir kún ómir súrdi me?
– Endi, Nursultan Ábishuly, shynyn aıtqanda baqytty kezde ómir súrip jatyrmyz ǵoı.
– Sen suraǵyma jaýap berseńshi?
– Táýelsizdiktiń arqasynda, sizdiń arqańyzda...
Prezıdenttiń tosynnan qoıǵan suraǵyna Arystanbek Muhamedıuly mandyrtyp jaýap bere almady. Óıtkeni, onyń basy baqyttan aınalyp otyrǵan bolatyn. Alaıda, mınıstrdiń baqyttan basy aınalatyndaı jaǵdaımyz jetisip turma? Máselen, teńge qunsyzdanyp, dollar sharyqtaǵannan keıin azyq-túlik baǵasy kúrt qymbattap ketti. Tipti, halyq kúndelikti tutynatyn nan baǵasy kóterildi. Sondaı-aq, jańa jyldan keıin as atasy taǵy da aspandaıyn dep otyr. Bul az bolǵandaı, jumystan qysqartý naýqany júrgizilip jatyr. Bul - bıyl bolyp jatqan jaılar. Sarapshylar keler jyly jaǵdaıymyz budan da qıyn bolatynyn aıtady. Alaıda, osyndaı qıyndyqtarǵa qaramastan Arystanbek Muhamedıulynyń basy baqyttan aınalyp júr.
Árıne, halyqtyń áleýmettik jaǵdaıyna Mádenıet jáne sport mınıstri jaýap bermeıdi. Sondyqtan, Arystanbek Muhamedıulynyń óz salasyna qatysty máseleni aıtaıyq. Mysaly, jyl basynda mınıstrlik Qazaq handyǵynyń 550 jyldyǵyna arnalǵan 20 serıaly fılm túsiretinin málimdedi. Alaıda, qarjy tapshylyǵyna baılanysty 20 serıaly fılm 10 serıaǵa qysqardy. Atalǵan teleserıaldy mınıstrlik jyldyń sońyna deıin kóremenniń nazaryna usynatynyn málimdegen bolatyn. Alaıda qarjy máselesi tez sheshilmegennen keıin Qazaq handyǵyna arnalǵan fılm keler jyly kórsetiletin boldy. Ras, atalǵan fılmdi túsirýde qarjy tapshylyǵynan bólek ýaqyt tapshylyǵy aıtarlyqtaı ról atqardy. Óıtkeni, mundaı aýqymdy sharýany jasaý úshin 2-3 jyl ýaqyt kerek edi. Degenmen, eń basty sebep jobaǵa bólingen 1 mıllıard teńge jetpeı otyrǵandyǵy bolyp otyr. Sondyqtan, fılmdi qarjylandyrýǵa arnalǵan qor qurylyp, el azamattaryna saýyn aıtyp otyr. Al Arystanbek Muhamedıulynyń basy baqyttan aınalyp júr.
Jalpy, baqyttan basy aınalyp júrgen jalǵyz Arystanbek Muhamedıuly ǵana emes. Máselen, jýyrda Úkimet basshysy Kárim Másimov «Biz eń jaqsy kezeńde ómir súrip jatyrmyz» degen bolatyn. Onyń aıtýynsha, jaqsy bastamalar, úlken jumystar daǵdarys kezinde iske asyrylady. Oryndy sóz. Alaıda bul tamasha múmkindikti qarasha halyq emes baı-baǵlandar paıdalanady emes pe? Mine, osydan-aq qarapaıym halyq pen bıliktiń arasy ashylyp ketkenin anyq bilýge bolady.
Serik JOLDASBAI
Astana
Pikir qaldyrý