Óńir basshysy Beıbit Atamqulov Ordabasy aýdanyna jumys saparymen baryp, birqatar áleýmettik jáne aýyl sharýashylyq nysandarymen tanysty, dep habarlady óńir basshysynyń baspasóz qyzmeti.
117 myńǵa jýyq halqy bar bul aýdan ónerkásip pen aýyl sharýashylyǵyna beıim óńir. Sapar barysynda oblys ákimi Shubarsý aýylyndaǵy jańadan paıdalanýǵa berilgen 600 oryndyq «Yntymaq» jalpy orta mektebin aralap kórip, bilim ordasynyń aınalasyn kógaldandyrýdy tapsyrdy.
Sonymen qatar, elimizdegi eń úlken 16 gektar jerge ornalasqan «Adelá» sharýa qojalyǵynyń jylyjaı kesheniniń jumysymen tanysty. ÚIID memlekettik baǵdarlamasy aıasynda iske qosylǵan bul keshen jylyna 9 myń tonna ónim óndiredi. Zamanaýı qurylǵylarmen qamtylǵan jylyjaıda 100-den astam azamat jumyspen qamtylǵan. Aýdanǵa jasaǵan saparynda aımaq basshysy «Badam» ındýstrıaldyq aımaǵynda ornalasqan «Agro-V» JSHS-niń «Bórte» sút taýarly fermasynyń qurylysy men avtomattandyrylǵan júıedegi jańa tehnologıaly qysh zaýytynda boldy. Kúnine 20 myń tonna shıki sút ónimin óndeýge qaýqarly sút fermasynyń qurylys jumystary 30 paıyzǵa aıaqtalǵan. Munda Shveısarıalyq jańa tehnologıadaǵy robot saýynshylarymen qamtamasyz etiledi dep kútilýde. Asyl tuqymdy sútti baǵyttaǵy «Golshteın» tuqymdy iri qarasy jylyna 6-7 myń lıtr sút beredi dep josparlanýda.
Jumys toby «Agro-V» JSHS-niń ekinshi jobasy 2014 jyly jumysyn bastaǵan qysh zaýytyn aralap kórdi. ÚIID memlekettik baǵdarlama aıasynda ashylǵan kásiporyn kúnine 70 myń, al jylyna - 22 mln. dana keramıkalyq qysh shyǵarady.
Munan soń asyl tuqymdy mal sharýashylyǵy kórmesi tamashalanyp, sharýalarmen kezdesý uıymdastyryldy. Mal basyn asyldandyrý baǵytynda aýdanda 3 asyl tuqymdy mal sharýashylyǵy jumys júrgizýde. Solardyń biri «Ordabasy» sharýashylyǵy qazaqtyń qylshyq júndi qoıyn asyldandyrady. Munda 8 myńǵa jýyq asyl tuqymdy qoı bar. Atalyq mal basy 120-125 kelige deıin et beredi. Óńirimizde osyndaı qoıdyń 70 myń basy bar. Bul OQO ǵalymdarynyń 21 jyldyq eńbeginiń jemisi.
Osydan keıin, óńir basshysy «100 mektep 100 aýrýhana» baǵdarlamasy aıasynda 2009 jyly paıdalanýǵa berilgen aýdandyq ortalyq aýrýhanaǵa bardy. 240 naýqasty qabyldap, emdeýge qaýqarly mekemede búgingi tańda 47 dáriger qyzmet etýde. Aýdan turǵyndaryna 55 emdeý-profılaktıkalyq mekemeler, atap aıtqanda, 1 aýdandyq emhana, 1 aýdandyq aýrýhana, 2 aýyldyq aýrýhana, 12 dárigerlik ambýlatorıa, 21 feldsherlik-akýsherlik beket, 18 medısınalyq beket qyzmet kórsetedi. Aýdanda salaýatty ómir saltyn qalyptastyrý jáne aýrýlardyń aldyn alý baǵdarlamasyna sáıkes 9 baǵytta jumystar atqarylýda.
Sapar sońynda oblys ákimi Temirlan aýylyndaǵy Halyqqa qyzmet kórsetý ortalyǵynyń jumysymen tanysty. Bul ortalyqqa kúnine 300-ge tarta tutynýshy keledi. Osy jyldyń toǵyz aıynda 101829 qujat qabyldanǵan.
Derekkóz: QazAqparat
