QR Prezıdenti Nursultan Nazarbaev Qazaqstan Táýelsizdiginiń 25 jyldyǵyn atap ótýge baılanysty daıyndyq sharalaryn bastaýǵa ruqsat berdi. Bul týraly búgin Memleket basshysy Astanada Qazaqstan Respýblıkasynyń Táýelsizdik kúnine arnalǵan saltanatty jıynda málim etti.
«Men bıyl kóktemde jarıalaǵan Ult josparyn oryndaýǵa kiristik. Ony elimiz Táýelsizdiginiń 25 jyldyǵy qarsańynda júzege asyrýdy bastaý sımvoldyq mánge ıe. Meniń oıymsha, elimiz Táýelsizdiginiń 25 jyldyq mereıtoıyn aldaǵy jyly merekeleýge daıarlyq sharalaryn barshamyzǵa bastaýǵa ruqsat berý durys bolady»,-dedi N. Nazarbaev.
«Qymbatty qazaqstandyqtar, qurmetti saltanatty jıynǵa qatysýshylar! Barshańyzdy «Uly dala» eliniń ulyq merekesi Táýelsizdik kúnimen shyn júrekten quttyqtaımyn! Biz búgin azattyqtyń ekinshi músheline, 25 jyldyǵyna aıaq bastyq. Árbir eldiń jylnamasynda onyń jańa tarıhynyń bastaýy bolǵan taǵdyrkeshti tańdar bolady. Biz úshin jańa dáýirdiń araı tańy 1991 jyly 16 jeltoqsanda atty. Sol kúni álem kóginde Qazaqstan Respýblıkasy atty máńgilik juldyz jarqyrap turdy. Tutas dáýirlerdiń kýási bolǵan halqymyz san ǵasyrlar buralań ári qıyn jolmen júrip ótti», - dedi Elbasy saltanatty jıynda.
