Búgin «Nur Otan» partıasy Tóraǵasynyń birinshi orynbasary Asqar Myrzahmetovtyń tóraǵylyǵymen partıa janyndaǵy BAQ ókilderimen qarym-qatynas jónindegi keńestiń alǵashqy otyrysy ótti. Bul týraly «Qamshy» portaly inform.kz-ke silteme jasap habarlaıdy. Atalǵan kezdesýde otandyq telearnalar men basylymdardyń birinshi basshylary bas qosyp, óz oılaryn ortaǵa saldy.
Qazaq serıalynyń bir bólimi 25 myń AQSH dollar, al úndi serıalynyń bir serıasy 350 AQSH dollar turady. Bul týraly "Astana" telearnasynyń bas dırektory Lázzat Tanysbaı málim etti. Onyń aıtýynsha otandyq teleserıaldar úndi serıaldarynan qaraǵanda jaqsy reıtıń jınaıdy. Alaıda ol telearnaǵa jarnama tartý úshin úndi serıaldaryn alýǵa májbúr bolyp otyrǵandyǵyn jasyrmady.
– Sońǵy jyldary zorlyq-zombylyq pen qylmysty tek jekemenshik telearnalar nasıhattaıdy degen úrdis qalyptasty. Memlekettik telearnalardyń áıteýir baǵyt-baǵdary, bólinetin qarjysy bar. Al, jekemenshik telearnalar jarnamanyń esebinen kún kórýge májbúr. Bizdi "Úndi serıaldaryn nege kórsetesińder?" dep synaıtyndar kóp. Keshirińizder, telearnalardyń top menedjerleri osy úndi serıaldaryn qatty jaqsy kóredi deısizder me? Joq, úndi serıaldary bizge joǵary reıtıń beredi. Reıtıń jarnamaǵa jol ashady, al, sol jarnamadan túsken qarajattan men qolastymdaǵy qyzmetkerlerge jalaqy tóleımin. Telearnalardyń top menedjerleri osy reıtıńtiń quly bolyp otyrmyz, ony moıyndaımyn, – deıdi L.Tanysbaı.
Sondaı-aq, ol qazaq teleserıaldary kóptep túsirilse, ol mindetti túrde reıtıń jınaıdy degen pikirde. Óıtkeni, otandyq ónimge degen qarasha halyq yqylasy joǵary. Alaıda ózimizde túsirilgen teleserıaldyń quny tym qymbatqa túsedi. Máselen, otandyq bir serıal túsirýge 20-25 myń AQSH dollary jumsalatyn kórinedi. Al, úndi serıalynyń bir serıasy 350 AQSH dollary turady. Aıyrmashylyq jer men kókteı.
Alaıda, arzannyń jiligi tatymaıtynyn qaperden shyǵarmaǵan jón. Ókinishke oraı, úndiniń arzan serıaldary halyqty azǵyndyqqa tárbıelep jatyr. Naqtyraq aıtsaq, basynan aıaǵyna deıin kek alýǵa qurylǵan serıal jastardy tasbaýyr etip jatyr. Alaıda ony oılap, bas qatyryp jatqan azamattar az. Mine, sol az azamattardyń biri hám biregeıi buǵan deıin Mádenıet jáne aqparat mınıstri bolǵan Muhtar Qul-Muhammed edi. Ol ózi mınıstr bolyp turǵanda «Túrik pen káris serıaldarynan bas tartamyz» dep málimdeme jasady. Áıtse de, eks-mınıstrdiń bastamasy ózi basshylyqtan ketkennen keıin qurdymǵa ketip, umyt qaldy.
Jalpy bizdiń elde ózine deıingi basshynyń isin jalǵastyrý abyroısyz is bolyp sanalady. Sonyń saldarynan qansha jerden halyqqa paıdaly is bolsa da, aıaqsyz qalyp keldi. Eger de basshylarymyz osy minezden arylyp, ózine deıingi mınıstrlerdiń isin jalǵastyratyn bolsa, nur ústine nur bolar edi. Alaıda, Muhtar Qul-Muhamed sózi sıaqty talaı bastamalar mınıstr qyzmetten ketkennen keıin umyt qaldy.
Serik JOLDASBAI
Astana
