Búgin Qaraǵandy qalasynyń Qazybek bı aýdandyq sotynda aıyptalýshy Dáýlet Sársenbaevqa qatysty qozǵalǵan isti tyńdaý barysynda sottalýshynyń kinási dáleldendi. Ol áleýmettik jelilerde qarjy polıseıleriniń atynan jalǵan hat jarıalap, onda Memlekettik qyzmet isteri jáne sybaılas jemqorlyqqa qarsy is-qımyl agenttigi men joǵary shendi sheneýnikterdi quqyqqa qaıshy is-áreketterge bardy dep aıyptaǵan. Burynǵy joǵary shendi sheneýnik kómekshileriniń «las» oıynyn Ulttyq qaýipsizdik komıtetiniń qyzmetkerleri áshkereledi, dep habarlaıdy BNews.kz tilshisi.

Osydan birneshe aı buryn ınternet-qaýymdastyqta úlken qyzyǵýshylyq týdyrǵan «Qarjy polıseıleriniń ashyq úndeýi» atty hat tek jalǵan ǵana emes, Serik Ahmetovtiń isi boıynsha sottalǵan Qaraǵandy oblysynyń burynǵy ákimi Baýyrjan Ábdishevtiń baýyry Dáýlet Sársenbaevtyń uıymdastyrǵan «las» oıyny bolyp shyqty.

Ulttyq qaýipsizdik komıteti atqarǵan jumystyń arqasynda sottalýshynyń jala jappaq bolǵany ári qasaqana jasaǵan is-áreketteri áshkerelendi. Birinshiden, qyzmetkerler D.Sársenbaevqa qarsy aıǵaqtardy anyqtaý boıynsha jumys júrgizdi. Tintý barysynda sottalýshy jalǵan hat ázirlep, joldaǵan kompúter tabyldy. Ekinshiden, tabylǵan aıǵaqtardyń tehnıkalyq saraptamasy júrgizildi. Úshinshiden, atalǵan is boıynsha 50-den astam kýágerden jaýap alyndy. Sot barysynda aıyptalýshy da kinásin tolyǵymen moıyndady.

Onyń aıtýynsha, ol osylaısha, Serik Ahmetovtiń isi boıynsha tergelip jatqan baýyryn tergeý kezinde taǵylǵan aıyptan qorǵaǵysy kelgen.

«Jýyrda Qaraǵandyda Serik Ahmetovtiń atyshýly isi aıaqtaldy. Meniń baýyrym Ábdishev te tergeldi. Baýyryma kómekteskim keldi. Bul hatym sotqa áser etedi dep oıladym. Óz qateligimdi moıyndaımyn. Keshirim suraımyn», - dedi sońǵy sózinde D.Sársenbaev.

Sottalýshy keshirim surady. Sot otyrysynyń qorytyndysy boıynsha Dáýlet Sársenbaev shartty túrde 2 jylǵa bas bostandyǵynan aıryldy.