Búgin Ulttyq ulan «Ońtústik» óńirlik qolbasshylyǵyna qarasty 7552 áskerı bóliminde Uly Otan soǵysynyń jáne Qazaqstan Respýblıkasy İshki áskerleriniń ardageri, Qazaqstan Respýblıkasy İİM qurmetti ardageri, otstavkadaǵy polkovnık Oshpanbaı Túzelbaıulynyń tuǵyrly 90 jasqa tolǵan mereıtoıy qarsańynda ulyqtaý jáne saltanatty túrde qurmet kórsetý is-sharasy bolyp ótti, - dep habarlaıdy «Qamshy» portaly Ulttyq ulan «Ońtústik» óńirlik qolbasshylyǵynyń baspasóz qyzmetine silteme jasap.
İs-shara barysynda sóz alǵan «Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystary jónindegi orynbasary Nurbaı Bektursynov mereıtoı ıesine Ulttyq ulan Bas qolbasshysy Jaqsylyqov Rýslan Fatıhulynyń atynan kelgen quttyqtaý hatyn jáne «Ońtústik» óńirlik qolbasshylyǵynyń qolbasshysy Álibek Serálıevtiń atynan quttyqtaý hattaryn tabys etse, Ardagerler Keńesiniń atynan otstavkadaǵy polkovnıkter Gennadıı Faleev pen Vasılıı Mezın quttyqtaý tilekterin arnap, Ardagerler Keńesiniń tóraǵasy otstavkadaǵy general-maıor Qalıaqpar Toqyshevtiń atynan kelgen quttyqtaý hatyn tabys etti. Bunymen qosa, ulyqtaý keshine ózimen birge qyzmettes bolǵan áriptesteri, Tyl ardagerleri, otstavkadaǵy ofıserler jáne 7552 áskerı bóliminiń jeke quramy da qatysyp, mereıtoıǵa arnalǵan konserttik baǵdarlamanyń kýási boldy.
Oshpanbaı Túzelbaıuly 1925 jyly Ońtústik Qazaqstan oblysynyń Eltaı aýylynda dúnıege kelgen.
1943 jyly Qyzyl Armıa qataryna shaqyrylyp, maıdanǵa attanady. Surapyl qandy maıdan jyldary el basyna kún týǵan kezde, tolarsaqtan saz keship, Otan qorǵaý jolynda Ýkraına men Belorýssıa qalalaryn azat etýde jáne Dnepr ózeni boıynda jaýǵa tosqaýyl qurýda jan aıanbaı ter tógedi. Uly Jeńis kúnin de sonaý Ýkraına ormandarynda jaý bandalarymen arpalysyp júrgende qarsy alady. Soǵys aıaqtalǵannan keıin de, 1945 jyly ary qaraı áskerı qyzmetin ótkerý úshin Túrkistan áskerı okrýgine joldanady. 1963 jyldan bastap İshki ásker quramyna kiretin 7552 áskerı bóliminde 17 jyl áskerı boryshyn ótep, sol jyldar ishinde vzvod komandıri, rota komandıriniń orynbasary jáne rota komandıri laýazymdarynda qyzmet atqarady.
1941-1945 jyldary Uly Otan soǵysynda jaýyngerlik is-qımyldarǵa qatynasqany jáne QR İİM organdary men İshki áskerdiń jaýyngerlik-qyzmettik mindetterin adal atqarǵany úshin: «Uly Otan soǵysynyń İ dárejeli» Ordeni, «Erligi úshin», «Germanıaǵa qarsy soǵystaǵy Jeńisi úshin», «Japonıaǵa qarsy soǵystaǵy Jeńisi úshin» medaldary sekildi túrli memlekettik nagradalarmen, bunymen qosa kóptegen mereıtoılyq medaldarmen jáne İshki ister mınıstrliginiń «Qurmetti ardageri» Qurmet belgisimen marapattalady.
1980 jyly zeınetkerlik jasqa tolýyna baılanysty «polkovnık» áskerı ataǵymen qurmetti zeınetkerlik demalysyna shyǵady.
«Osy jasqa jetkenshe taǵdyr-tarıh jolynda kezdesken talaı bógetterge tótep berip, qashan da jeńiske jete bilgen ol, qazirgi ýaqytta 90 jasqa kelse de Qazaqstan Respýblıkasy İİM Akademıasy Ardagerler uıymy Keńesiniń tóraǵasy bolyp qyzmet atqarýda. Qurmetti demalysta júrse de, İshki áskerler ardageri retinde óskeleń urpaqty áskerı-patrıottyq rýhta tárbıeleýde erekshe belsendilik tanytyp, ózi uzaq jyldar boıy qyzmet etken polky – 7552 áskerı bólimimen únemi tyǵyz baılanys jasap keledi» delingen habarlamada.
