Aqtaýda jol ústinde "qoıylym kórsetken" jaıaý júrginshini jergilikti júrgizýshilerdiń biri vıdeoǵa túsirip aldy, - dep habarlaıdy «Qamshy» portaly Tengrinews.kz – ke silteme jasap.

Basylymnyń málimetinshe, rolıkten avtokólik júrgizýshisiniń jaıaý júrginshini qaǵyp ketkenin kórýge bolady. Alaıda, oqıǵanyń kýágerleri zardap shekken adamnyń áreketi mıǵa qonbaıdy dep málimdedi. Sebebi, olardyń aıtýynsha, er adam kólikti ózin qaqtyrýǵa tyrysqan.

"Sol sátte baǵdarshamda jaıaý júrginshiniń júrýine ruqsat etetin sıgnal berildi. Jigit jaıaý júrginshiler jolyna asyqpaı kelip, ótip bara jatqan kóliktiń astyna jyldam baryp tústi. Júrgizýshi birden toqtady. Zardap shekken adamnyń óz betinshe turyp, telefonyn alyp shyqqanyn vıdeodan kórýge bolady. Osydan keıin ol avtokóliktiń aldyna baryp, ony qaǵyp ketkendeı etip, jerge jatyp aldy", - dedi rolıktiń avtory.

Júrgizýshilerdiń aıtýynsha, bul jaǵdaıǵa qatysty eki túrli nusqany qarastyrýǵa bolady. "Jaıaý júrginshi mas bolǵan nemese esirtki shekken nemese bul jala jabýdyń jańa túri", - deıdi olar. Osyǵan baılanysty aqtaýlyqtar bul oqıǵany tyńǵylyqty zertteýdi polıseılerden ótinip otyr.