Álıhan Bókeıhan HH ǵasyrdyń uly saıasatkerleriniń biri. Álekeńdi Mahatma Gandı, Nelson Mandela sıaqty búginde álem tanyp otyrǵan saıasatkerlermen qatar tanýymyz kerek. Óıtkeni, olar ımperıa sheńgelinen shyǵý úshin, óz halqynyń azamattyq quqyqtary úshin beıbit túrde kúresken tulǵalar. Tipti, Azamat soǵysy jyldarynda Lenın men Dzerjınskıı kontrrevolúsıonerlerge "rasstrel na meste!" dep, atyp tastaýǵa anyq úkim shyǵaryp jatqanda, Alashorda úkimetiniń tóraǵasy retinde halyqty búlinshilikten qorǵaý úshin Alash mılısıasyn qurdy. Mılısıany ásker emes, el qorǵany dep túsindirdi jáne sol jolda qyzmet etýge úndedi. Jetisý maıdanyndaǵy bólshevıkterdiń qandy qyrǵynynan soń, Sovet ókimetin májbúrli túrde tanıyq, endi tek Sovetke qarsy aǵartýshylyq árekettermen qarsy turaıyq dedi. Atylar aldynda "Men Sovet ókimetin eshqashan súıgen emespin, májbúrli túrde tanydym" dedi aqtyq sózinde. Álıhannyń ult-azattyq kúresindegi basty tásili - moıynsunbaý. Kisi balasyna qyldaı qıanat etpeı, aryn taza saqtaǵan, ultty naǵyz adamshyl isterge bastaǵan Álekeńniń árýaǵyna myń da bir taǵzym!