بۇرىن قازاق ساۋداگەرلەرى قىتايلىق ءونىمدى قىرعىزستان بازارلارىنان ساتىپ الىپ، ەلگە اكەلەتىن. قارا بازار جيىرما جىلعا جۋىق ۋاقىت قىرعىزستاننان تاسىلاتىن تاۋارمەن كۇن كورىپ كەلدى. ەلدەگى ديەۆالۆاسيا سالدارىنان ەندىگى جاعداي كەرىسىنشە وربۋدە. قىرعىزداردىڭ الماتى نارىعىنا اعىلۋى جاڭا جىلدان سوڭ باستالعان. ايىر قالپاقتىلار بىزدەگى قۇنى تومەن تاۋارعا قىزىعىپ، ونىمدەرىمىزدى وزدەرىنە جاپپاي تاسىپ جاتىر. بۇل تۇسىنىكتى دە. ويتكەنى ءقازىر قىرعىزستاندا گاز بەن بەنزين قۇنى بىزدەگىدەن الدەقايدا قىمبات. كورشىلەرىمىز سوڭعى جارتى جىلدىڭ وزىندە 250 ملن تەڭگەگە ەكسپورت جاساعان، - دەپ حابارلايدى الماتى تەلەارناسى.

"قىرعىز ەلى ەۋرازيالىق ەكونوميكالىق وداققا كىرگەلى 307 حابارلاما تۇسكەن. بۇل ەكسپورتقا قاتىستى تۇسكەن حابارلامالاردىڭ سانى. جالپى 84 سالىق تولەۋشى الماتى قالاسىندا تىركەلگەن. ولار 54،5 ميلليون سومعا ەكسپورت جاساعان. بۇل تەڭگەمەن شاققاندا 250 ميلليون تەڭگە"،- دەدى الماتى قالاسى مەملەكەتتىك كىرىستەر دەپارتامەنتىنىڭ ءبولىم باسشىسى ەدىل ءازىمشايىق.

ىرگەلەس ەلگە نەگىزىنەن تۇرمىستىق تەحنيكا، ۇن ونىمدەرى مەن جۇمىرتقا سىندى تاۋار تۇرلەرى ەكسپورتتالىپ جاتىر. ماسەلەن، قازاق ۇنى ساپالى ءارى ءار كەلىسى 5-10 سومعا ارزان. بۇرىن بىشكەكتەگى بازارلار ورتا ازياداعى ەڭ ارزان ساۋدا ورتالىقتارى بولسا، ءقازىر يمپورتتىڭ ارتۋى بۇل وڭىرگە جايسىز ءتيىپ، تاۋار اينالىمىن تۇرالاتىپ تۇر. ءبىراق ساراپشىلار كورشى ەل تۇرعىندارىنىڭ قاجەتىن قازاقستاننان ىزدەۋى ۇزاققا سوزىلمايدى دەپ سانايدى.

"تۇرمىستىق تەحنيكالار مەن قۇرىلىس زاتتارىن ساتىپ الۋ جاڭا جىلدان بەرى جاقسى ءجۇرىپ جاتىر. ءبىراق ول كوپ ۋاقىتقا سوزىلمايدى. قىرعىزداردىڭ قازاقستاننان بۇنداي زاتتاردى جاپپاي ساتىپ الۋى ارى كەتسە ەكى-ۇش ايعا سوزىلادى. ولاردىڭ بىزگە كەلۋى قازاقستان نارىعىنا ەرەكشە سەرپىن بەرمەيدى. بىزدەگى باعانىڭ وسۋىنە دە وزگەرىس اكەلمەيدى. ويتكەنى ول جاقتاعى تۇتىنۋشىلار سانى از. ءارى ولاردىڭ جەڭىل ونەركاسىبى بىزبەن سالىستىرعاندا جاقسى دامىعان"،- دەدى گەنناديي شەستاكوۆ.

قىرعىزستان ۇلتتىق ستاتيستيكا كوميتەتىنىڭ دەرەگىنشە، وتكەن جىلى رەسپۋبليكا 1،3 ميلليارد دوللاردىڭ ءونىمىن ەكسپورتقا شىعارىپ، 3،7 ميلليارد دوللاردىڭ تاۋارىن سىرتتان اكەلگەن. قىرعىز ساراپشىلارى "ۇكىمەت دوللاردى ەركىنە جىبەرەيىن دەسە، بيۋدجەت قىزمەتكەرلەرى قينالىپ، سىرتقى قارىز وسەدى. دوللار باعامىن ۇستايىن دەسە، ءوندىرىس زارداپ شەگەدى" دەيدى. قىرعىزستان ەۋرازيالىق ەكونوميكالىق وداقتىڭ تۇتىنۋشى ەلىنە اينالماۋى ءۇشىن ءقازىر ءوز نارىعى مەن كاسىپكەرلەرىن قورعاۋدىڭ جاڭا جولىن جانتالاسا قاراستىرىپ جاتىر.