26 اقپاندا ماجىلىستە پالاتا سپيكەرى نۇرلان ءنىعماتۋليننىڭ توراعالىعىمەن وتكەن جالپى وتىرىستا دەپۋتات جامبىل احمەتبەكوۆ قازاقستان رەسپۋبليكاسىنىڭ  پرەمەر-مينيسترى سەرىك احمەتوۆكە دەپۋتاتتىق ساۋال جولدادى.

«حالقىمىزدىڭ اسىل پەرزەنتتەرى جۇمابەك تاشەنوۆ پەن رابيعا ەسىمجانوۆانىڭ 100 جىلدىق مەرەيتويلارىن رەسپۋبليكالىق دارەجەدە لايىقتى اتاپ ءوتۋ تۋرالى وسى دەپۋتاتتىق ساۋالدى جولداپ وتىرمىن.

2015 جىلى 20 ناۋرىزدا ج.تاشەنيەۆتىڭ تۋعانىنا 100 جىل تولادى. جۇمابەك احمەت ۇلى تاشەنيەۆ كەڭەس زامانىندا ەسىمى اڭىزعا اينالعان تۇلعا، 1960 جىلدارى قازاقستاننىڭ جوعارعى كەڭەسىن جانە ۇكىمەتىن باسقارعان، رەسپۋبليكانىڭ الەۋمەتتىك-ەكونوميكالىق جانە مادەنيەتى مەن ونەرىنىڭ دامۋىنا ۇلكەن ۇلەس قوسقان مەملەكەت قايراتكەرى.

ەلى مەن جەرىنىڭ تۇتاستىعىن ساقتاپ قالۋ جولىندا كۇرەسكەن جۇمابەك تاشەنيەۆ حرۋششيەۆتىڭ قازاقستاننىڭ بەس وبلىسىن (سول كەزدەگى سەلينوگراد قالاسىمەن قوسا) رەسەيگە قوسۋدى جوسپارلاعان ارەكەتىنە باتىل تويتارىس بەرگەن. وسىنداي تاباندى قارسىلىققا كەزدەسكەن حرۋششيەۆ بۇدان كەيىنگى ۋاقىتتا قازاق ىشىنەن شىققان باسشىلاردىڭ سوزدەرىنە قۇلاق سالۋعا، حالقىنىڭ پىكىرىمەن ساناسۋعا ءماجبۇر بولعان. ەگەر سول جوسپار ىسكە اسقاندا قازاقستاننىڭ ءبىر بولىگىنەن، قازىرگى استانا قالاسىنان دا ايىرىلىپ، مەملەكەتىمىزدىڭ تەرريتوريالىق تۇتاستىعىنان دا ءبىرجولا قوشتاساتىن جاعداي ەدى. سوندىقتان  جۇمابەك تاشەنيەۆتىڭ بۇل ارەكەتى حالىقتىڭ ۇلتتىق رۋحىن وياتقان ەرلىك وقيعا بولدى.

         وسى وقيعادان كەيىن ول جوعارى لاۋازىمدى قىزمەتىنەن الىنىپ، وبلىستىق باسشى دەڭگەيىنە دەيىن تومەندەتىلدى. ءوزى باقىلاۋدا جۇرسە دە باتىر قايراتكەر رۋحىن تۇسىرمەدى، عىلىممەن اينالىستى جانە حالقى ءۇشىن ادال قىزمەت ەتىپ زەينەتكەرلىككە شىقتى. ج.ا.تاشەنيەۆكە قازاق جەرى مەن حالقى ءۇشىن جاساعان ەرلىگى مەن ەڭبەگىنە ۇرپاقتارى ماڭگىلىك قارىزدار. مىنە، سوندىقتان دا حالىق جۇرەگىندە ساقتالعان ابزال جاننىڭ جارقىن بەينەسىن، ەسىمىن، ەرلىگىن جاڭعىرتىپ وتىرۋ بۇگىنگى ۇرپاقتىڭ پارىزى دەپ بىلەمىز.

قازاقستاننىڭ حالىق ءارتيسى، كۇمىس كومەي ءانشى رابيعا ەسىمجانوۆانىڭ تۋعانىنا بيىل 100 جىل تولدى. وكىنىشكە وراي ەسىمى بۇكىل ەلىمىزگە تاراپ، اتى اڭىزعا اينالعان ءانشى اپامىزدىڭ مەرەيتويى ەلىمىزدە اتالىپ وتكەن جوق.

رابيعا ەسىمجانوۆا 1914 جىلى قازاقتىڭ كەڭ دالاسى سارىارقانىڭ تورىندە، قازىرگى اقمولا وبلىسى، قورعالجىن اۋدانىندا دۇنيەگە كەلگەن. ونەر جولىن سەمەي وبلىستىق مۋزىكا دراما تەاترىندا دراما ءارتيسى رەتىندە باستاعان. كەيىن الماتى، قاراعاندى قالالارىنداعى تەاتر ترۋپپاسىندا قىزمەت ەتىپ، م.اۋەزوۆتىڭ «ەڭلىك-كەبەگىندە» ەڭلىكتىڭ، «ايمان-شولپانىندا» ايماننىڭ، ە.گ.برۋسيلوۆسكييدىڭ «قىز جىبەگىندە» جىبەكتىڭ رولدەرىن شەبەرلىكپەن سومداپ حالىقتىڭ شەكسىز ريزاشىلىعىنا يە بولعان. 1946-1960 جىلدار ارالىعىندا ر.ەسىمجانوۆا قازاق راديوسىنىڭ ءانشىسى بولدى. 1960 جىلدان باستاپ ءومىرىنىڭ سوڭىنا دەيىن «قازاقكونسەرت» بىرلەستىگىنىڭ ءانشىسى رەتىندە حالىققا قىزمەت ەتتى. حالقىمىزدىڭ سۇيىكتى قىزى، بۇلبۇل ءانشى رابيعا ەسىمجانوۆانىڭ رەپەرتۋارىندا نەگىزىنەن حالىق اندەرى: «اۋپىلدەك»، «اپيتوك»، «گاۋھارتاس»، «جالعىز ارشا»، «جونىپ الدى»، «ءلايلىم شىراق»، «قۇداشا»، «ماڭماڭكەر» ت.ب. جانە حالىق كومپوزيتورى ش.قالداياقوۆتىڭ اندەرى بولدى. رابيعا ەسىمجانوۆانىڭ ەلىمىزدىڭ مادەنيەتى مەن ونەرىن دامىتۋعا قوسقان زور ۇلەسى مەملەكەتتىك ناگرادالارمەن ماراپاتتالعان. ول «قۇرمەت بەلگىسى» وردەنىنىڭ يەگەرى جانە «قازاقستاننىڭ ەڭبەك سىڭىرگەن ءارتيسى»، «قازاقستاننىڭ حالىق ءارتيسى» اتاقتارى بەرىلگەن.

ۇلتىمىزدىڭ ارداقتىلارى ج.تاشەنيەۆ پەن ر.ەسىمجانوۆانىڭ 100 جىلدىق مەرەيتويىن رەسپۋبليكالىق دەڭگەيدە لايىقتى اتاپ ءوتۋ ماسەلەلەرىن قاراستىرۋىڭىزدى جانە دەپۋتاتتىق ساۋالدى قازاقستان رەسپۋبليكاسىنىڭ قولدانىستاعى زاڭناماسىندا بەلگىلەنگەن تارتىپپەن قاراپ، جاۋابىن جولداۋىڭىزدى سۇرايمىن».