ەلباسى نۇرسۇلتان نازاربايەۆ بۇگىن الماتى قالاسىندا قالانى دامىتۋ جانە دۇنيەجۇزىلىك 28-قىسقى ۋنيۆەرسياداعا دايىندىق ماسەلەلەرى جونىندەگى جيىن بارىسىندا وسىلاي دەپ مالىمدەدى. بۇل تۋرالى «قامشى» پورتالى حابارلايدى.

پرەزيدەنت ن. نازاربايەۆ وڭىرلەردە «تىلدەر تۋرالى» زاڭنىڭ تالاپتارى ساقتالماي وتىرعانىن تىلگە تيەك ەتىپ، پرەزيدەنت اكىمشىلىگىنە ناقتى تاپسىرما بەردى.

«ماعان ازاماتتار ورىسشا جازعان حاتىنا قازاقشا جاۋاپ الۋدا دەگەن سىبىستار جەتىپ جاتىر. ەگەر ادام ورىس تىلىندە ءوتىنىش بەرسە، وعان سول تىلدە، ياعني ورىس تىلىندە جاۋاپ الۋى ءتيىس. پرەزيدەنت اپپاراتىنا بارلىق وبلىستاردى تەكسەرۋدى تاپسىرامىن. مۇنى جاساپ جۇرگەندەردىڭ بارلىعى جۇمىستان قۋىلسىن!»، - دەدى ن. نازاربايەۆ.

سونداي-اق، پرەزيدەنت قازاقستاننىڭ كوپۇلتتى مەملەكەت ەكەنىن تاعى ءبىر ەسكەرتكەن.

«سىزدەر بىلەتىندەي، ءبىز ءۇش ءتىلدى وقىتۋدى بەلگىلەدىك. وسى بەتتەن تايماۋ كەرەك. مادەنيەت مينيسترىنە زاڭ بارىن ايتقىم كەلەدى. ءبىراق، كەيبىر شەنەۋنىكتەر العا قاراي اسىعىستىق جاساپ، بارلىعىن قازاقشا سويلەتكىسى كەلەدى. ءبىز – كوپۇلتتى مەملەكەتپىز، ءبىز وسى فاكتىنى قابىلدادىق»، - دەدى ول.