«قازاقستان دامۋ بانكى» جەڭىلدەتىلگەن اۆتونەسيە باعدارلاماسى بويىنشا جەكە تۇلعالاردىڭ 5161 ءوتىنىشىن قاناعاتتاندىردى. بۇل تۋرالى بۇگىن ورتالىق كوممۋنيكاسيالار قىزمەتىندە وتكەن بريفينگتە «قازاقستان دامۋ بانكى» اق باسقارما ءتوراعاسى بولات جامىشيەۆ ءمالىم ەتتى، - دەپ حابارلايدى «قامشى» پورتالى قازاقپاراتقا سىلتەمە جاساپ. 

«قارجىلاندىرۋ شارتتارىنا سايكەس جەڭىلدەتىلگەن اۆتونەسيە باعدارلاماسى اياسىندا 5161 ءوتىنىش قاناعاتتاندىرىلدى. ول بويىنشا 16 ملرد. 904 ملن. تەڭگەگە قازاقستاندا قۇراستىرىلعان اۆتوكولىك ساتىپ الىنادى. 11 اقپانداعى جاعداي بويىنشا التى بانك-اگەنتكە 4523 اۆتوكولىك ساتىپ الۋ ءۇشىن 14،5 ملرد تەڭگە ءبولىندى»، - دەدى بولات جامىشيەۆ.

ونىڭ ايتۋىنشا، اۆتونەسيە بويىنشا ۇلتتىق قوردان بولىنگەن 15 ملرد تەڭگە قاراجاتتىڭ ءبىرىنشى ترانشى 87 پايىزعا يگەرىلگەن. حالىق 13 ملرد تەڭگەگە اۆتونەسيە العان. 2016 جىلى بولىنگەن 11 ملرد. تەڭگە 12،7 پايىزعا يگەرىلىپ، 1،4 ملرد. تەڭگەگە اۆتونەسيە بەرىلگەن.