استانادا "ماحاببات" تۇرعىن ءۇي كەشەنىنىڭ ونداعان تۇرعىنىن، ونىڭ ىشىندە وقۋشى بالالاردى دا نارازىلىق اكسياسى كەزىندە پوليسيا ۇستاپ اكەتتى. ازاتتىق ءتىلشىسىنىڭ حابارلاۋىنشا، ەسىلدىڭ وڭ جاعالاۋىندا ورنالاسقان مەديا ورتالىققا 30 شاقتى ادام بارعان. ولار سوت شەشىمىمەن وزدەرىن پاتەرلەرىنەن شىعارىپ جاتقاندارىن ايتقان. نارازىلىق اكسياسىنا قاتىسۋشىلاردىڭ ايتۋىنشا، تۇرعىندار پروبلەمالارىنا جۋرناليستەردىڭ نازارىن اۋدارتۋ ءۇشىن قازاقستاندىق بىرنەشە اقپارات قۇرالدارىنىڭ وكىلدىكتەرى ورنالاسقان مەديا ورتالىققا بارعان. ورتالىق جانىندا بىرنەشە مينۋت بويى تۇرعان نارازىلار قولدارىنا "ءۇيسىز وتان بولمايدى"، "حالىقتى باسپاناسىز قالدىرماڭدار" دەگەن جازۋ جازىلعان پلاكات ۇستاپ العان. بىرنەشە مينۋتتان كەيىن پوليسيا ولاردى ۇستاپ، ەكى اۆتوبۋسپەن پوليسيا بولىمشەسىنە الىپ كەتتى. "ماحاببات" تۇرعىن ءۇي كەشەنىنىڭ تۇرعىندارى بۇعان دەيىن وزدەرىن تۇرىپ جاتقان ۇيلەرىنەن شىعارۋ تۋرالى سوت شەشىمىن قايتا قاراۋدى تالاپ ەتىپ، بىرنەشە رەت نارازىلىق اكسياسىن وتكىزگەن ەدى. ولار بيلىك ورگاندارىنا تالاي رەت حات تا جازعان. 2009 جىلى  400-دەن استام ادام 49 پاتەردى جالعا الۋ تۋرالى كەلىسىم-شارتقا وتىرىپ، تۇرعىن ءۇي كەشەنى يەسىنە اقشا تولەپ كەلگەن. الايدا قوجايىن ءۇيدى باسقا كومپانياعا ساتىپ جىبەرىپ، جاڭا قوجايىن ولاردان پاتەرلەردى بوساتۋدى تالاپ ەتكەن. سوت تۇرعىنداردىڭ كەلىسىم-شارتتارىن "جارامسىز( دەپ تاۋىپ، ولاردى پاتەرلەرىنەن شىعارۋ تۋرالى شەشىم قابىلداعان. ءبىراق ولار پاتەردەن شىعارۋعا نارازىلىق تانىتىپ، كەلىسىم-شارت جاساسقان ادامداردىڭ ۇستىنەن ارىزدانعان.

"ازاتتىق راديوسى"