بۇگىن استانادا وتكەن اۋىل شارۋاشىلىعى مينيسترلىگىنىڭ القا ماجىلىسىندە مينيستر مامىتبەكوۆ مۇنداي جيىنداردى وتكىزۋ كەڭەستىك داۋىردەن قالعان ەسكى ءداستۇر ەكەندىگىن ايتىپ، ونىڭ تيىمدىلىگىنە كۇمان كەلتىردى.
مينيسترلىكتىڭ جيىنىنا پرەمەر-مينيستردىڭ ءبىرىنشى ورىنباسارى باقىتجان ساعىنتايەۆ قاتىسقان ەدى.
«تۇتاستاي العاندا وتكىزىلىپ وتىرعان فورماتتاعى مۇنداي القا ماجىلىستەرى كەڭەستىك زاماننان كەلە جاتقان كونەرگەن ءداستۇر. مۇنداي ۋاقىت وتكىزۋلەردەن ۇلكەن ناتيجە كورىپ وتىرعام جوق. ءبىز ءتۇرلى فورماتتا ونسىز دا كەزدەسىپ ءجۇرمىز. جاقىندا عانا فەرمەرلەر وداعىنىڭ باس قوسۋى بولدى. وندا ماڭىزدى ماسەلەلەر كوتەرىلدى. ءبىز تىكەلەي تاۋار وندىرۋشىلەرمەن كەزدەستىك. ال، مىنا جەردە ءبىز، ءبىرىڭعاي شەنەۋنىكتەر، ءوزارا جينالىپ الىپ وز-وزىمىزگە بارلىعىمىز بىلەتىن سيفرلار تۋرالى ەسەپ بەرىپ وتىرمىز. ءبىراق ءبىزدىڭ جۇمىستىڭ فورماتى وسىنداي. ونى وزگەرتۋگە ءقازىر ءبىزدىڭ شامامىز كەلمەيدى»، - دەيدى اسىلجان مامىتبەكوۆ مىرزا.
جيىندا اسىلجاندى ناقتى ماسەلەلەردىڭ كوتەرىلمەگەنى اشىندىرسا كەرەك. مينيستر ۇكىمەت جيىندارىنا قاراعاندا بيزنەس-قاۋىمداستىقتاردىڭ باس قوسۋلارى ناقتى ماسەلەلەردى شەشەتىنىن تىلگە تيەك ەتتى.
«ال، ءقازىر ورمانشىلار فيتوسانيتاريا تۋرالى، ال، مالشىلار ورمانشىلار تۋرالى اڭگىمە تىڭداپ وتىر. ياعني، ءبىز قانداي دا ءبىر تاپسىرمالاردى ورىنداپ، قانداي دا ءبىر جاڭالىقتار ەنگىزۋ ورنىنا ءبىر-بىرىمىزدىڭ قىرۋار ۋاقىتىمىزدى بوسقا الىپ وتىرمىز. ماسەلەلەر جەتكىلىكتى، ءبىز القا ءماجىلىسىن اقپاراتتىق تۇرعىدا پايدالانعىمىز كەلدى. ياعني، زاڭعا ەنگىزىلگەن بارلىق وزگەرىستەردى، ساياساتتاعى وزگەرىستەردى تۇگەل ايتتىق»، - دەگەن ول پرەمەر-مينيستردىڭ ءبىرىنشى ورىنباسارىنا قاراتا.
ساعىنتايەۆ قاتىسقان جيىندا قازاقستان استىعىن قىتايعا ەكسپورتتاۋ، حالال يندۋستريانى دامىتۋ، اۋىل شارۋاشىلىعى سالاسىنداعى سۋبسيديالاۋ ماسەلەلەرى ءسوز بولعان. ۆيسە-پرەمەر قىتايدىڭ قازاقستان استىعىنا دەگەن سۇرانىسىن ءتيىمدى پايدالانۋ تۋرالى ايتا كەلە مينيسترلىك جۇمىسىنداعى كەمشىلىكتەرگە دە نازار اۋدارعان بولاتىن.
«بىزدە تەك ءبىر تۇيتكىل عانا بار. ول - ءبىزدىڭ مەملەكەتتىك ورگانداردىڭ ۇيلەسىمسىز جۇمىسى. ءبىز وسى تۋرالى ايتقاندا، تەحنيكالىق رەتتەۋ كوميتەتى بۇل ءىستى اۋىل شارۋاشىلىق مينيسترلىگىنە ىسىردى، مينيسترلىك بولسا، كوميتەتتىڭ جۇمىسى دەپ ات تونىن الا قاشتى. ءاربىر مەملەكەتتىك ورگان ءوز مىندەتتەمەلەرىنەن قاشۋدا. ناتيجەسىندە - «باياعى جارتاس، سول جارتاس». جۇمىس ورنىنان قوزعالعان جوق»، - دەدى ول.
مامىتبەكوۆ مىرزا ۆيسە-پرەمەردىڭ وسى سوزىنە شامداندى ما، ءماجىلىس سايلاۋىنان كەيىن بولاتىن ۇكىمەتتىڭ جاڭارۋىنا بايلانىستى سەبەبى بولدى ما، مينيسترلىك قىزمەتكەرلەرىنىڭ الدىندا، پرەمەردىڭ ورىنباسارىنىڭ كوزىنشە باتىل بايانداما جاسادى. بىلدەي ۇكىمەت باسشىسىنىڭ ورىنباسارى جەتەكشىلىك جاساپ وتىرعان جيىندى «ۋاقىتتى بوسقا وتكىزۋ» دەپ اتادى.
الايدا، بۇعان ساعىنتايەۆتىڭ دا ساعى سىنا قويماعان سياقتى. مينيسترلىك ۇجىمىنا سايلاۋ تۋرالى انەكدوت ايتىپ بەرگەن.
«جاقىندا ءازىربايجان مەن گرۋزيادا ءىسساپاردا بولدىم. ءازىربايجاننىڭ پرەمەرى سول كەزدە جاقسى ءبىر انەكدوت ايتىپ بەردى.
ەلدە سايلاۋ ءوتىپتى. ءبىر پارتيا جەڭىسكە جەتىپتى. پارتيا سەركەسى باسقارۋ، ەكونوميكا سالاسىندا جۇمىس ىستەمەگەن جاس جىگىت ەكەن. سايلاۋ بىتكەن سوڭ كەڭەسشىلەرىن جيناپ الىپ، سۇراپتى دەيدى.
- بىزدە مۇناي بار ما؟
- جوق.
- گاز شە؟
- جوق.
- التىن..
- جوق.
- مىس شە؟
- ول دا جوق.
- ورمان بار ما؟
- ورمان دا جوق.
- قوي، وندا جۇمىس ىستەيىك، - دەپتى سوندا. جامان انەكدوت ەمەس»، - دەپ اگرارلىق سالانىڭ قۇلاعىن ۇستاعانداردىڭ كوڭىلىن كوتەرۋگە تىرىسقان.
پىكىر قالدىرۋ