الماتى ۋنيۆەرسيتەتىنىڭ ستۋدەنتتەرى قوعام قايراتكەرى، حالىقارالىق «قازاق ءتىلى» قوعامىنىڭ پرەزيدەنتى، اكادەميك ءومىرزاق ايتبايەۆپەن كەزدەستى. سىر-سۇحبات «قازاق عىلىمى: كەشە، بۇگىن، ەرتەڭ» دەگەن تاقىرىپتا ءوتتى. سونىمەن قاتار، اكادەميكتىڭ ونەگەلى ءومىرى مەن شىعارماشىلىعى، عىلىمي ەڭبەكتەرى مەن قايراتكەرلىك قىزمەتى جايلى بۇكپەسىز اڭگىمەلەر ايتىلدى، - دەپ حابارلايدى ۋنيۆەرسيتەتتىڭ باسپا ءسوز قىزمەتىنەن.

          العاشقى ءسوز كەزدەسۋدى ۇيىمداستىرۋشى ۋنيۆەرسيتەتىمىزدىڭ دوسەنتى، فيلولوگيا عىلىمىنىڭ كانديداتى راحمانوۆا نۇرجانات مالدىبايقىزىنا بەرىلدى. رۋحاني ۇستازى جايلى تەرەڭ دە ماعىنالى ەستەلىك ايتىپ، ومىردەرەكتەرىنەن كوپتەگەن مىسالدار كەلتىرە وتىرىپ، عىلىمي زەرتتەۋ جۇمىستارىنداعى ەرەكشە اتاپ وتەتىن ءتورت باعىتقا توقتالدى.  

- ونىڭ ەڭ ءبىرىنشىسى، فرازەولوگيالىق تىركەستەردىڭ قىر-سىرىن اشۋعا، فرازەولوگيزمدەردىڭ قازاق-ورىس تىلدەرىندەگى بولمىسىن قاراستىرۋ ارقىلى اۋدارما ماسەلەسىنە بايلانىستى عىلىمي قورىتىندىلار جاسادى. ەكىنشى، تەرمينولوگ عالىم رەتىندە قازاق تەرمينولوگياسىن قوعامدىق عىلىمدار سالالارى بويىنشا تۇبەگەيلى زەرتتەپ، ونىڭ دامۋى مەن قالىپتاسۋ شەڭبەرىن انىقتادى. ءۇشىنشى، ءومىرزاق ايتبايەۆ قازاق لينگۆيستيكاسىنىڭ ستيليستيكا، ءتىل مادەنيەتى، ادەبي ءتىل ءتارىزدى سالالارى بويىنشا وزىندىك پىكىر ءوربىتىپ جۇرگەن عالىم. ءتورتىنشى، قازاق ءتىلىنىڭ مەملەكەتتىك ءتىل رەتىندە مارتەبەلەنۋ جولىنداعى ىزدەنىستەرى مەن كۇرەستەرىن ءوز الدىنا ءبىر سالا، باعىت رەتىندە قاراعانىمىز ءجون. ياعني، ول قازاق ءتىلىن مەملەكەتتىك ءتىل رەتىندە قالىپتاستىرۋشى ماماننىڭ ءبىرى،-دەدى نۇرجانات مالدىباي قىزى ءوز بايانداماسىندا.

ودان ارمەن سەناريي بويىنشا قازاق ءتىلى مەن ادەبيەتى ماماندىعىنىڭ ستۋدەنتتەرى عالىمنىڭ جازعان ولەڭدەرى مەن ءتىل تۋرالى تولعانىستارىنان ءۇزىندى وقىدى. 2 كۋرس ستۋدەنتتەرى ايتاقىن مارلەن مەن ءالىپ نۇراحمەت ارناۋ ولەڭدەرىن جاتقا ايتتى. كەزەك سىر-سۇحباتقا كوشتى. ستۋدەنتتەر كوكەيلەرىندە جۇرگەن سۇراقتارىن قويسا، اكادەميك اشىلا سويلەپ، بۇگىنگى عىلىم مەن ءبىلىمنىڭ، ءتىلدىڭ جاي-كۇيى جايلى ءوز پىكىرىن ءبىلدىردى.

قىرعىز كينوسىنىڭ قايتالانباس تۋىندىسى سانالاتىن «ىستىقكولدىڭ القىزىل گۇلدەرىندە» ءبىرجان سالدىڭ «تەمىرتاس» ءانىن ورىنداعان ءومىرزاق ايتبايەۆ ەكەندىگىن بىرەۋ بىلسە، بىرەۋ بىلمەس. كينوعا داۋىس بەرۋدىڭ تاريحى جايلى دا كەرەمەت سىر شەرتىلدى. كەزدەسۋدىڭ ەڭ قىزىقتى ءساتى ستۋدەنتتەر قوناعىمىزدان قوناق كادە سۇرادى. سەگىز قىرلى، ءبىر سىرلى ءومىرزاق ايتبايەۆ جاستاردىڭ ءوتىنىشى بويىنشا ءبىرجان سالدىڭ «تەمىرتاس» ءانىن ىقىلاسپەن ورىنداپ بەردى.

كەزدەسۋدىڭ قورىتىندى ساتىندە ۋنيۆەرسيتەتتىڭ تاربيە ءىسى جونىندەگى پرورەكتورى امانعالييەۆا سىمبات تلەگەن قىزى:

- كەڭەس ۇكىمەتى تۇسىندا ورىستاندىرۋ ساياساتىنىڭ ناتيجەسىندە قازاق مەكتەپتەرى مەن بالاباقشالارى ساناۋلى بولاتىن. جالعىز قازاقشا ءبىلىم بەرەتىن №12 مەكتەپ بولعانىن ءبارىمىز جاقسى بىلەمىز. سول كەزدە بىرنەشە قازاق مەكتەبى پەن بالاباقشاسىنىڭ اشىلۋىنا ءومىرزاق ايتبايەۆتىڭ تيگىزگەن ۇلەسى زور. ءتىل جاناشىرى رەتىندە جاساعان ەڭبەكتەرىڭىزدى وسى وتىرعان جاستار ەشقاشان ۇمىتپاسى انىق. وسى جىلى سەكسەننىڭ سەڭگىرىنە كەلىپ وتىرسىز. ءسىزدىڭ دەنىڭىزگە ساۋلىق، وتباسىڭىزعا اماندىق تىلەيمىن. ءبىزدىڭ وقۋ وردامىزعا كەلىپ، ستۋدەنتتەرمەن سىر-سۇحبات جۇرگىزۋگە كەلىسكەنىڭىزگە ءدان ريزامىن،-دەپ اتاپ ءوتتى.

ادام بالاسىنىڭ قالىپتاسۋىنا، وزىندىك سانا سەزىمىنىڭ ورنىعۋىنا ۇشقان ۇيا، وسكەن ورتا ايرىقشا اسەر ەتەرى راس. اكادەميك قورىتىندى سوزىندە: «مەن اقىل-وي مەن ءبىلىم، بىلىك دەگەن ۇعىمداردى كىتاپتى كوپ وقۋ ارقىلى سەزىنگەندەيمىن»،- دەدى. ونىڭ وسى وقۋعا دەگەن قۇشتارلىعى ءومىر وزەنىندە ءوز جالعاسىن تاۋىپ، ق ر عىلىمدار اكادەمياسىنىڭ ءتىل ءبىلىمى ينستيتۋتىندا كىشى عىلىمي قىزمەتكەردەن اكادەميك دارەجەگە دەيىن جەتكىزدى. مۇنىڭ ءبارى تاباندى ەڭبەك پەن عىلىمعا دەگەن سۇيىسپەنشىلىكتىڭ ناتيجەسىندە بولارىن ستۋدەنتتەر كەزدەسۋ بارىسىندا ۇعىندى.