رەسەيلىك 66.ru پورتالى ەكاتەرەنبۋرگ تۇرمەلەرىنىڭ بىرىندەگى سوتتالعانداردى قورلاۋ ءساتى تۇسىرىلگەن ۆيدەو جاريالادى، - دەپ حابارلايدى «قامشى» پورتالى.

ۆيدەوداعى وقيعا يك-2 دەپ اتالاتىن تۇزەۋ مەكەمەسىندە بولعان. پورتال اتالعان تۇزەۋ مەكەمەسىنىڭ اكىمشىلىگى سوتتالعانداردى ازاپتاۋ مەن قورلاۋدىڭ قالىپتاسقان جۇيەسىن ورناتقان دەپ جازادى.

اتاپ ايتقاندا، تۇزەۋ مەكەمەسىنە جاڭادان كەلگەن سوتتالعاندار «كارانتين جاساعى» دەپ اتالاتىن جاساقتىڭ سىنىنان وتەدى. كولونيا اكىمشىلىگىنە جۇمىس ىستەيتىن سوتتالعاندار ولارعا مەكەمەنىڭ «ءتارتىبىن» تۇسىندىرەتىن كورىنەدى. وعان باعىنعىسى كەلمەگەندەر سوققىعا جىعىلىپ، ۆيدەوداعىداي قورلىققا ۇشىرايدى.

قۇقىققورعاۋشىلار وسى ۋاقىتقا دەيىن كولونياداعى زاڭسىز جۇيەنى اشكەرەلەيتىن دالەل بولماي كەلگەنىن، سوتتالۋشىلار بوستاندىققا شىققاننان سوڭ دا كولونيا اكىمشىلىگىنىڭ زاڭسىز ارەكەتتەرى تۋرالى شاعىمدانۋعا سەسكەنەتىنىن ايتقان.

«يك-2 تۇزەۋ مەكەمەسىندە قورقىنىشتى جاعدايلار كوپ. ونداعى جاتقاندارك ولونيا قىزمەتكەرلەرىنىڭ ءتۇرلى «راسىمدەرى» مەن «مەحانيزمدەرىنەن» وتەدى. ول ارەكەتتەردى تەك قىلمىس دەپ قانا باعالاۋ كەرەك. تۇرمە بەلسەندىلەرى ول ارەكەتتەرىن كەيىن سوتتالعاندارعا شانتاج جاساۋ ءۇشىن ارنايى ۆيدەوعا تۇسىرەدى»، - دەيدى سۆەردلوۆ وبلىسى قوعامدىق باقىلاۋ كەڭەسىنىڭ مۇشەسى دميتريي روجين.

ال، zona.media سايتى وسى ۆيدەوداعى وقيعا بويىنشا رف پروكۋراتۋراسىنىڭ تەرگەۋ كوميتەتى قىلمىستىق ءىس قوزعاعانىن جازدى.