قىزىلوردا وبلىسىندا ۇرلانعان ەسەكتەردى سويىپ، تەرىسىن ساتىپ جۇرگەن ەكى ازامات ۇستالعان، - دەپ حابارلايدى «قامشى» پورتالى Tengrinews.kz-كە سىلتەمە جاساپ.

اقپان ايىنىڭ ورتاسىنا تامان الەۋمەتتىك جەلىدە ءولى ەسەكتەردىڭ سۋرەتى جاريالانىپ، ونىڭ اۆتورى قىزىلوردا وبلىسىنداعى ءوزى تۇراتىن اۋىلدا ەسەكتەردىڭ تەرىسىنىڭ سىپىرىلىپ جاتقانىن جازعان ەدى. قولدانۋشى وقيعانىڭ ناقتى قاي اۋىلدا بولعانىن كورسەتپەگەن، الايدا سۋرەتتەن ون شاقتى ەسەكتىڭ تەرىسى سىپىرىلىپ، اينالانىڭ قان بولىپ جاتقانىن كورۋگە بولادى.

بۇل جازباعا قالدىرىلعان پىكىرلەردىڭ اراسىندا ەسەكتەردىڭ ەتىن ساتىلىمعا شىعارۋعا قاتىستى جازىلعان كوممەنتارييلەر بولدى. الايدا اۆتور بىرنەشە كۇننەن كەيىن جازباسىن ءوز پاراقشاسىنان ءوشىرىپ تاستادى. وسىعان بايلانىستى وبلىستىق ءىىد-ى بىلاي دەپ تۇسىنىكتەمە بەرگەن:

"ۆكونتاكتە" الەۋمەتتىك جەلىسىندە ورنالاستىرىلعان اقپاراتتىڭ جويىلۋىنا بايلانىستى جازبا اۆتورىنان ءتيىستى مالىمەت الۋ مۇمكىندىگى بولمادى. قىزىلوردا وبلىستىق ىشكى ىستەر دەپارتامەنتىندە ەسەكتىڭ ەتىن ساتىلىمعا شىعارۋ دەرەكتەرى تىركەلمەگەن. الايدا ەسەك مالىنىڭ تەرىسىن پايداعا اسىرۋ ماقساتىندا سويىپ، تەرىسىن سىلىپ الۋ فاكتىلەرى تىركەلىپ، اتالعان دەرەكتەر بويىنشا ءتيىستى تەرگەپ-تەكسەرۋ امالدارى جۇرگىزىلىپ جاتىر. اتاپ ايتقاندا، بيىل 2 اقپاندا سىرداريا اۋدانىنىڭ تۇرعىنى مال قوراسىنان ءبىر باس ەسەك مالىنىڭ جوعالىپ كەتكەنى جايلى ارىزدانعان بولاتىن. اتالعان دەرەك بويىنشا ق ر قىلمىستىق كودەكسىنىڭ 188-بابى 2-بولىگىمەن (ادامدار توبىنىڭ الدىن الا ءسوز بايلاسۋىمەن، بiرنەشە رەت، تۇرعىن، قىزمەتتiك نەمەسە ءوندiرiستiك ءۇي-جايعا، قويماعا نە كولىك قۇرالىنا زاڭسىز كiرۋمەن جاسالعان ۇرلىق) قىلمىستىق ءىس قوزعالىپ، جۇرگىزىلگەن شارالار ناتيجەسىندە وسى اۋداننىڭ 2 ازاماتى ۇستالدى. تەرگەپ-تەكسەرۋ بارىسىندا اتالعان ازاماتتاردىڭ ەسەك مالىن سويىپ، تەرىسىن ساتىپ جىبەرگەنى انىقتالدى. قازىرگى تاڭدا اتالعان دەرەك بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر". ايتا كەتەيىك، ولاردىڭ بۇل قىلمىسى دالەلدەنگەن جاعدايدا مۇلكى تاركىلەنىپ، ءۇش مىڭ ايلىق ەسەپتiك كورسەتكiشكە دەيiنگi مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە بەس جىلعا دەيiنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋ جازاسىنا تارتىلۋى مۇمكىن. 

ءىىد مالىمەتىنشە، ساۋداعا تۇسكەن ەتتەردىڭ "ەسەكتىكى" بولماۋىنا، تاماق ءونىمى قاۋىپسىزدىگىن قامتاماسىز ەتىپ، تۇتىنۋشىلاردىڭ دەنساۋلىعى مەن سانيتارلىق-گيگيەنالىق تالاپتارىنىڭ بۇزىلماۋىنا سانيتارلىق-ەپيدەميالىق قىزمەت ماماندارى جاۋاپتى جانە بۇل سالادا قۇقىقبۇزۋشىلىق انىقتالسا سالا ماماندارىمەن ءتيىستى اكىمشىلىك شارا قارالادى. ال ەگەر ەسەك ەتىن ساتۋ دەرەگى تىركەلىپ، سانيتارلىق قاعيدالاردى نەمەسە گيگيەنالىق نورماتيۆتەردى ابايسىزدا بۇزۋ، ادامداردىڭ جاپپاي سىرقاتتانۋىنا نەمەسە ۋلانۋىنا اكەپ سوققان جاعدايدا ىشكى ىستەر دەپارتامەنتىنىڭ قىزمەتكەرلەرى ق ر قىلمىستىق كودەكسىنىڭ 304-بابى ("سانيتاريالىق قاعيدالاردى نەمەسە گيگيەنالىق نورماتيۆتەردى بۇزۋ") بويىنشا قىلمىستىق جاۋاپكەرشىلىككە تارتادى.

"كەز كەلگەن قۇقىقبۇزۋشىلىقتىڭ الدىن الۋ، جولىن كەسۋ، بولدىرماۋ باعىتىندا ىشكى ىستەر دەپارتامەنتى تاراپىنان ءتيىستى الدىن الۋ شارالارى قابىلدانادى"، - دەلىنگەن ءىىد تۇسىنىكتەمەسىندە.