وڭتۇستىك قازاقستان وبلىسى ورداباسى اۋدانى امانگەلدى اۋىلىندا ۇرلانىپ، كەشە ارىس قالاسىندا تابىلعان مۇحاممەد قامشىبەك تۋرالى پوليسياعا حابار بەرىپ، ونى قۇتقارۋعا كومەكتەسكەن قىزدىڭ باسىنا ءقاۋىپ تونۋدە. بۇل تۋرالى فەيسبۋك الەۋمەتتىك جەلىسىندە بيبىگۇل داۋلەتبەك حابارلادى.

«شىمكەنتتەگى بالاقايدىڭ تابىلعانىنا قازاقستان حالقى قۋانۋدا. ال، وسى بالانى تاۋىپ بەرۋگە سەبەپشى بولعان قىزدىڭ جاعدايى قانداي كۇيدە ەكەنىن مەن عانا بىلەم. قازىردە ينەنىڭ ۇشىندا وتىر. دالاعا ەمىن-ەركىن شىعۋدان قالدى.

قايسار قىز كەشە 6 جاسار مۇحاممەدتىڭ جوعالعانىن ينستاگرامعا جازعانىمدا، بىردەن ماعان حابارلاسقان ەدى.

-بيبىگۇل اپاي، مەن بۇل بالانى كوردىم. حيدجابتاعى ايەل ەمەس، باسقا 50-55 جاستاعى ايەل مەن جانىندا 35- 40 جاس شاماسىندا ەر كىسى بولدى، -دەپ ايتقان. مەن شۇعىل تۇردە پوليسيا بولىمىنە حابارلاسۋىن ايتتىم. ول قىز قورىقسا دا، ىىب-نە حابارلاستى(مەندە اۋديوزاپيس تا بار). كەشە تۇندە ەر كىسىنىڭ فوتوروبوتىن جاساۋعا تاعى الگى قىزدى ۇيىنەن الىپ كەتتى. تۇنگى 1-30-دا. وپەرمەن سويلەسكەنىمدە، قىزدىڭ ومىرىنە ءقاۋىپ تونبەيتىندەي جاعداي جاساۋىن ءوتىندىم.

الايدا، ءيا، الايدا، بايعۇس قىز بۇگىن ۇيىنەن شىعا الماي وتىر. دۇكەنگە بارىپ نان ساتىپ الۋعا قورقىپ وتىر. سەبەبى، بالانى ۇرلاعان ەركەك بوستاندىقتا ءجۇر. دوستارىممەن سويلەسىپ، 102 بولىمىنە حابارلاسۋىن ايتتىم. نەگە قىزدىڭ جاعدايىن جاسامايدى؟! ماراپاتتار بەرمەي-اق قويسىن. ءبىراق، بۇل قىز دا ادام بالاسى ەمەس پە؟! سوندا بالانى تاۋىپ بەرۋگە اتسالىسقان قىزدى پايدالاندى دا، ءارى قارايعى ومىرىنە جاۋاپ بەرمەيمىز دەگەن نەمقۇرايلىق پا بۇل؟!

جاۋاپ بەرىڭىزدەرشى، وسىندا ەگەر وقو ءىىب-نىڭ قىزمەتكەرلەرى بولسا؟!

قىزدىڭ ەسىمى قۇپيا تۇردە ۇستالۋ كەرەك. ءبىراق بوستاندىقتا جۇرگەن ەركەك قىزدىڭ تۇرىپ جاتقان پاتەرىن بىلەدى. ماسەلە سوندا بولىپ تۇر»، - دەيدى بيبىگۇل داۋلەتبەك.