قازاقستانداعى ادام قۇقىعى جونىندەگى وكىل اسقار شاكىروۆ 2015 جىلدىڭ قورىتىندىسى بويىنشا مەملەكەت باسشىسىنا ۇسىنعان ەسەبىندە وسىلاي دەگەن. بۇل تۋرالى «قامشى» پورتالى حابارلايدى.

مەملەكەت باسشىسىنا ۇسىنىلعان قۇجاتتا ەلدەگى ادام قۇقىعىنا قاتىستى احۋالعا، سونىڭ ىشىندە ازاماتتاردان تۇسكەن ارىزداردىڭ، قۇقىق قورعاۋ جونىندەگى جوبالاردىڭ، وڭىرلەردەگى مونيتورينگتىڭ، سونداي-اق مەملەكەتتىك ورگانداردىڭ، ۇكىمەتتىك ەمەس جانە حالىقارالىق ۇيىمداردىڭ اقپاراتتارى نەگىزىندە ساراپتاما جاسالعان.

ەسەپتە قازاقستانداعى ادام قۇقىعى سالاسىنداعى وزەكتى پروبلەمالار انىقتالىپ، ولاردى شەشۋ جولدارى ۇسىنىلعان.

اتاپ ايتقاندا، ومبۋدسمەنگە ەسەپتى كەزەڭدە ادام قۇقىعىن قورعاۋ ماسەلەلەرى بويىنشا جازباشا جانە اۋىزشا 1340 ارىز تۇسكەن، ولاردىڭ باسىم كوپشىلىگى استانا جانە الماتى قالالارىنان، قاراعاندى، الماتى جانە شىعىس قازاقستان وبلىستارىنان جولدانعان.  

ازاماتتار ءوز قۇقىقتارى كوبىنە قۇقىق قورعاۋ ورگاندارى تاراپىنان، سوتتاردىڭ ارەكەتى مەن شەشىمدەرىنە، پەنيتەنسيارلىق ورگاندارعا، سونداي-اق مەملەكەتتىك اكىمشىلەندىرۋ كەزىندە بۇزىلعانىنا شاعىم جاساعان. بۇل جايتتار «100 ناقتى قادام» ۇلت جوسپارى ارقىلى شەشىمىن تابۋ كوزدەلگەن پروبلەمالارمەن تولىق سايكەسەدى.

ءىس جۇرگىزۋگە الىنعان ءاربىر شاعىمعا بايلانىستى ماسەلە بەلگىلەنگەن تارتىپپەن قارالىپ، سونىڭ 18،9%-ى بويىنشا قۇقىق بۇزىلۋ دەرەكتەرى راستالدى جانە ءىس قۇقىقتى قالپىنا كەلتىرۋگە دەيىن جەتكىزىلدى.

سونىمەن قاتار ومبۋدسمەن ۇيلەستىرەتىن، ازاپتاۋ جانە وزگە دە قاتىگەزدىكتەر مەن جازالاۋدىڭ الدىن الۋ جونىندەگى ۇلتتىق تەتىكتەر اياسىندا بۇكىل ەل بويىنشا 528 مونيتورينگتىك ماقساتتاعى ءىس-شارالار جۇزەگە اسىرىلىپ، سونىڭ ىشىندە تۇزەۋ مەكەمەلەرى، ماجبۇرلەپ ەمدەۋ ۇيىمدارى، ۋاقىتشا وقشاۋلاۋ ورىندارى، كامەلەتكە تولماعانداردى بەيىمدەۋ ورتالىقتارى، ارناۋلى ءبىلىم بەرۋ ۇيىمدارى قامتىلدى. مەكەمە اكىمشىلىكتەرىنە جانە مەملەكەتتىك ورگاندارعا ادامداردى كۇتىمگە الۋ احۋالىن جاقسارتۋ جونىندە ۇسىنىمدار بەرىلدى.

قۇقىق بۇزۋ تۋرالى شاعىمداردى (1544 ساۋال) بيلىك ورگاندارىمەن بىرلەسىپ قاراۋ ءوزارا ىقپالداستىق جانە كونسۋلتاتيۆتىك-كەڭەسشىلىك ورگانداردىڭ جۇمىسىنا قاتىسۋ ارقىلى جۇزەگە اسىرىلدى.  

ومبۋدسمەن مەكەمەسى 212 ۇلتتىق جانە 53 حالىقارالىق ءىس-شاراعا قاتىستى. مەكەمەنىڭ ءوزى رەسپۋبليكانىڭ بارلىق وكىلدەرىن قامتي وتىرىپ، ەلدىڭ 7 وڭىرىندە جابىق مەكەمەلەردەگى قۇقىق قورعاۋ، مونيتورينگ، بالالار قۇقىعى جانە حالىقتىڭ باسقا دا ءالسىز توپتارى ءۇشىن 12 وقىتۋ شاراسىن ۇيىمداستىردى جانە وتكىزدى.   

حالىقارالىق دەڭگەيدە ادام قۇقىقتارى جونىندەگى بارلىق جاھاندىق، وڭىرلىك ۇيىمدارمەن، شەت ەلدەردەگى ارىپتەستەرمەن، سونىڭ ىشىندە بۇۇ، يۋنيسەف، ەقىۇ، ەو، ەۋروپا كەڭەسى، ۇلتتىق قۇقىق قورعاۋ  مەكەمەلەرىنىڭ حالىقارالىق ۇيلەستىرۋ كوميتەتى جانە باسقا دا ۇيىمدارمەن تىعىز ىنتىماقتاستىق ورناتىلدى. حالىقارالىق قىزىل كرەست كوميتەتىنىڭ، كوشى-قون جونىندەگى حالىقارالىق ۇيىمنىڭ، بۇۇ ادام قۇقىقتارى كوميتەتىنىڭ، بۇۇ-نىڭ ادام قۇقىقتارى جانە بوسقىن ىستەرى جونىندەگى جوعارعى كوميسسارياتتارىنىڭ، يسلام ىنتىماقتاستىعى ۇيىمىنىڭ، نيدەرلاند، نورۆەگيا، ءباا، ۇلىبريتانيا، رەسەي قۇقىق قورعاۋ مەكەمەلەرىنىڭ باسشىلارىمەن، سونداي-اق بۇۇ-نىڭ ءتۇرلى ماسەلەلەر جونىندەگى ارناۋلى بايانداماشىلارىمەن كەزدەسۋلەر وتكىزىلدى.

«جالپى، ۇلتتىق قۇقىق قورعاۋ مەكەمەسى الداعى ۋاقىتتا ادام قۇقىقتارىن قورعاۋدى قامتاماسىز ەتۋ جانە قازاقستان رەسپۋبليكاسىنىڭ حالىقارالىق قۇقىقتىق مىندەتتەمەلەرىن ورىنداۋ جونىندەگى مەملەكەتتىك ساياساتقا اتسالىسۋ جۇمىستارىن جالعاستىراتىن بولادى.

مەملەكەت باسشىسى ەسەپتى قاراپ شىققان سوڭ ءتيىستى تاپسىرمالار بەردى»، - دەلىنگەن اقوردا سايتىندا.