اتىراۋدا ۇستالعان جۇرگىزۋشى پوليسيا كولىگىندە ءوزىن-وزى ۇردى. ەر ادام كامەرانىڭ ءتۇسىرىپ جاتقانىن سەزبەي، ءوز بەتىن جۇدىرىقپەن ءتۇيىپ-تۇيىپ جىبەردى، - دەپ جازادى Today.kz.
وقيعا 24 اقپاندا تۇنگى ۋاقىتتا "جۇلدىز" ىقشاماۋدانىندا بولعان. قالادان شىعا بەرىستە پوليسيا 35 جاسار قوستانايلىق باسقارعان Lada Largus كولىگىن توقتاتقان. تەكسەرۋ كەزىندە كولىكتەن جالپى سالماعى 210 كيللوگرام بولاتىن، قاندايدا ءبىر قۇجاتسىز تيەلگەن سازان بالىقتار انىقتالعان.
"جۇرگىزۋشى تانىستارىنا قوڭىراۋ شالىپ، تەلەفوندى پوليسەيلەرگە بەرە الماعان سوڭ، ءوزىن بىرنەشە رەت جۇدىرىقپەن ۇرىپ، "102" كەزەكشى بولىمىنە پوليسيا قىزمەتكەرلەرى قول كوتەردى دەپ حابارلاعان"، - دەيدى ءىىد باسپا ءسوز قىزمەتىنىڭ جەتەكشىسى گۇلنازيرا مۇحتاروۆا.
قازىرگى كەزدە قۇجاتسىز بالىق بويىنشا قىلمىستىق ءىس قوزعالدى. ال "سوققىعا" جىعۋ فاكتىسى بويىنشا اتىراۋ وبلىسى ءىىد قاۋىپسىزدىك قىزمەتى اينالىسۋدا.
