تۇرمىسقا شىعۋدى ارمانداعان دەكان، باسقارما باسشىسى، عىلىم كانديداتى، دوكتور سەكىلدى وتىرىپ قالعان وقىعان قىزدار تانىسۋ ورتالىعىنان جىگىت ىزدەۋدە جانە ولار وزىنەن 10 جاس كىشى جىگىتتەرگە قىزىعادى ەكەن، - دەپ حابارلايدى «قامشى» پورتالى NUR.KZ-كە سىلتەمە جاساپ.

اقتوبەدەگى قىز بەن جىگىتتى تابىستىراتىن «سەرۋەن» وتباسىلىق وقىتۋ ورتالىعى ارقىلى 68 جۇپ شاڭىراق كوتەرگەن. جۇپ ىزدەگەندەردىڭ اراسىندا 26 جاستاعى قىزداردان باستاپ، 65 جاستاعى ەر ازاماتتارعا دەيىن بار. ولاردىڭ اراسىنان وتباسىن قۇرماعاندار مەن اجىراسقانداردى دا تابۋعا بولادى. وتىز جاستان اسىپ ۇيلەنە الماي جۇرگەن قىزدار كوپ. قىرىققا كەلگەندە ايەلى قايتىس بولعان ەر ازاماتتار ورتالىقتان كومەك سۇراپ كەلەدى ەكەن.

«63 جاستاعى ايەلدەر بار. جالعىز بولعىسى كەلمەيدى، «جاستاۋ ازاماتتار بولسا» دەپ ءوتىنىش ءبىلدىرىپ كەلەدى. بىزگە مەشىتتەگى يمامداردىڭ دا كەلەتىنى راس. الپىس جاستان اسقان ونىڭ ايەلى قايتىس بولعان ەكەن. ول كىسىنىڭ ءوزى تۇسىنىكسىزدەۋ بولدى. وعان قاجەتتى ايەل ادامدى تاۋىپ بەرە المادىم. بىزگە «تەك جىنىستىق قاتىناس ءۇشىن ادام ىزدەيمىز» دەپ مازالايتىندار دا بار. ولار تۇسىنبەيدى، «اقشاسىن تولەيمىن» دەپ دىكەڭدەپ تۇرىپ الادى. اسىرەسە، ونداي قوڭىراۋلار ەر ادامداردان بولادى. ءبىز جىنىستىق قاتىناس ەمەس، وتباسى قاتىناسىن ورناتۋعا جۇمىس ىستەپ جاتىرمىز دەپ تۇسىندىرەمىن»، - دەيدى «سەرۋەن» وقىتۋ ورتالىعىنىڭ باسشىسى رايسا جاقىپوۆا.
وقىتۋ ورتالىعى جالعىز جۇرگەندەردى تانىستىرىپ، بەرىك وتباسى بولۋدىڭ قۇپياسىمەن تانىستىرادى. قىزمەت كورسەتۋ اقىلى.

«كەلگەن ادام تىركەلۋ ءۇشىن 5000 تەڭگە تولەيدى. ءارى قاراي وقىتۋ كۋرسىنا 100 دوللار تولەۋگە ءتيىس. بۇرىن بۇل 300 دوللار بولاتىن. دوللار باعامىنىڭ وزگەرۋىنە بايلانىستى ازايتتىق. بىزگە كەز-كەلگەن ادام تىركەلە المايدى. ىشىمدىككە سالىنعان ادامدى جولاتپايمىز. ەر ادامدارعا قويىلاتىن نەگىزگى تالاپ - ونىڭ تۇراقتى جۇمىسى بولۋى كەرەك، نەمەسە كاسىپكەر بولۋعا ءتيىس. رۋحاني جاعىنان دۇرىس ادامدى قارايمىز. اقىلى بولعاننان كەيىن قاراپايىم ادامدار كوپ جولاي قويمايدى»، - دەيدى ورتالىق باسشىسى.

ورتالىق باسشىسى وزىنە قالتالىلاردىڭ كەلەتىنىن جاسىرعان جوق.

«مۇندا ادامدار ىرىكتەلەدى. قىزدار دا انشەيىن قاڭعىپ جۇرگەندەر ەمەس، وقىعان قىزدار. عىلىم كانديداتتارى، دوكتورلار، مۇناي كومپانياسىندا ۇلكەن قىزمەتتە ىستەيتىن 2-3 ديپلومدى قىزدار بار. ۇلكەن مەكەمەلەردى باسقارىپ وتىرعان قىزدار سەنىپ كەلەدى. سوندىقتان، مەن ولارعا لايىق ەر ادامداردى ىزدەيمىن. ءقازىر تانىسۋ قيىن ەمەس. ول ءۇشىن عالامتوردىڭ ءوزى جەتىپ جاتىر. مەن كەلگەن ادامنىڭ تالعامىنا قاراۋىم كەرەك» ، - دەيدى رايسا جاقىپوۆا.

ورتالىققا كەلگەن ادام اقىلى انكەتا تولتىرادى، ءوزىن قىسقاشا تانىستىرىپ، ۆيدەوعا جازىلادى. قانداي اداممەن تانىسقىسى كەلەتىنىن ايتادى. ورتالىقتا 68 ادام شاڭىراق قۇرعانىن باسشى ماقتانىشپەن جەتكىزدى. ايتۋىنشا، ادامداردىڭ تالعامى ءارتۇرلى.

«ءقازىر ايەلدەر وزىنەن جاس جىگىتتەردى ىزدەپ جاتىر. ال، ەر ادامدار قىزداردىڭ ۇلكەن بولعانىن قالىپتى دەپ قابىلدايدى. «ۇلكەن بولا بەرسىن» دەيدى. قىزداردىڭ ون جاس ۇلكەندىگىنە دە ءمان بەرمەيدى. قازىرگى جاستار ونى ەش ەرسىلىكسىز قابىلدايدى. ءبىز ارقىلى ون جاس ۇلكەن قىزدارعا ۇيلەنگەن ەر ادامدار بار. ولاردىڭ جەكە باستارىنا ىڭعايسىزدىق بولماس ءۇشىن جەكەلەپ توقتالعىم كەلمەيدى. مەن ونداي كەزدە قىز لجىگىتتىڭ ارتىنان جۇگىرەتىن شىعار دەپ ويدايتىنمىن. جوق، كەرىسىنشە، جىگىتتەردىڭ ۇلكەن قىزداردىڭ ارتىنان قالاي جۇگىرگەنىن كوزىممەن كوردىم. ەر ادامداردى قىلمەن ۇستاي بىلەتىن قىزداردىڭ بار بولعانىنا قۋانامىن»، - دەيدى ورتالىق باسشىسى.
وتباسى بولعىسى كەلىپ، ورتالىقتى جاعالاپ جۇرگەندەردىڭ دەنى بىلدەي قىزمەتتەگى ادامدار بولىپ شىقتى.

«ساۋاتتى، ۇلكەن قىزمەتتەگى ادامدار كوپ كەلەدى. جۇبىن ىزدەۋشىلەردىڭ اراسىندا ۇلكەن مەكەمەلەردى باسقارىپ وتىرعان باسشىلار كوپ. ۇلكەن وقۋ ورنى ديرەكتورىنىڭ ورىنباسارى، دەكان قىزدار بار. بىزگە قاراپايىم ادامداردىڭ اقشاسى جەتپەيدى. مەن وتباسى تۋرالى وقىتقاندا ءار نارسەنى ءوز ومىرىمنەن الامىن. 35 جاسىمدا تۇرمىسقا شىقسام دا، بارىنە ۇلگەردىم. مەن وتىز جاسقا دەيىن ادام ۇيلەنىپ بولۋ كەرەك دەپ ويلايمىن. ءومىر قىسقا، بارىنە ۇلگەرۋ كەرەك»، - دەيدى رايسا جاقىپوۆا.

ءوز ومىرىنەن العان تاجىريبەسىن وزگەلەرگە ۇيرەتىپ جۇرگەن ورتالىق باسشىسى بۇل قىزمەتتى قالاي باستاعانىن دا ايتىپ بەردى.

«مەن ءوزىم پسيحولوگپىن، 35 جاسىمدا كەش تۇرمىسقا شىقتىم. شۇكىر، جولداسىممەن بىرگە 40 جىلدان بەرى بىرگەمىز. مۇمكىن، اقشاعا قۇنىعىپ كەتكەن بولۋىم كەرەك، ءبىر كەزدەرى قاتتى سىرقاتتانىپ قالدىم. اۋرۋدان تۇرعاننان كەيىن «سەرۋەن» ورتالىعىن 15 جىل بۇرىن ادامدارعا ساۋاپ جاساۋ ماقساتىندا اشتىم. ول كەزدە قىزدار جۇمىس ىستەدى. ولار تەك اقشا تابۋدىڭ جولىن ىزدەدى. 2000 تەڭگەگە تىركەپ، ادامداردى تانىستىردى. ول كەزدە قوڭىراۋعا دا ەسىككە دە تىنىم بولمايتىن. القاشتار از بولعان جوق. قىز ىزدەپ تۇرمەدەن شىققان ادامدار دا ءجۇردى»، - دەيدى «سەرۋەن» وقىتۋ ورتالىعىنىڭ ديرەكتورى.

ەڭ العاشىندا ورتالىق توي ۇيىمداستىرۋ جۇمىستارىنان باستاعان. تويدى بەزەندىرۋدەن، جاس جۇبايلارعا بال ايىن ۇيىمداستىرىپ بەرۋمەن اينالىسادى. كەيىن قىزدار مەن جىگىتتەردى تانىستىراتىن شاعىن اگەنتتىك قىزمەتىن اتقارادى

«التى جىل ورتالىقتا تانىسۋ كەشتەرىن ۇيىمداستىردىم. ادامداردىڭ ويىن بىلگىم كەلدى، قوعام قالاي قابىلدار ەكەن دەپ ويلادىم. ۇيلەنبەي جۇرگەن ادامدار كىمدەر؟ ولار نە سەبەپتى وتباسىن قۇرماي جالعىز جۇرگەنىن بىلگىم كەلدى. بي كەشتەرى ارقىلى جالعىز جۇرگەندەردى تانىستىردىم»، - دەيدى ول.

ورتالىقتا ادامداردىڭ جەكە وتىرىپ كەزدەسەتىن ورنى دا بار. ولار شاي ءىشىپ وتىرىپ، ءۇش ساعاتتاي ەركىن سويلەسەدى.