ءال-فارابي اتىنداعى قازۇۋ-دا «جامبىل اقىندىق مۇراسى جانە جامبىلتانۋدىڭ وزەكتى ماسەلەلەرى» اتتى حالىقارالىق عىلىمي-پراكتيكالىق كونفەرەنسيا ءوتتى. «ادامدىقتى، ەرلىكتى، باتىرلىقتى، ەل بىرلىگىن ساقتاعان تاتۋلىقتى ايتقان» كەلەلى جيىن عىلىم مەن ءبىلىمنىڭ قاسيەتتى قارا شاڭىراعىندا رەسەي، گرۋزيا، تۇركيا، قىرعىز ەلدەرىنەن ارنايى كەلگەن عالىمداردىڭ باسىن قوستى، - دەپ حابارلايدى «قامشى» پورتالى.

ءحىح عاسىردىڭ سوڭعى شيرەگى مەن حح عاسىردىڭ العاشقى جارتىسىنداعى حالىقتىڭ رۋحاني ومىرىندە جامبىلدىڭ الار ورنى ەرەكشە بولعان. ول العاشىندا ەل ءومىرىن شىنايى جىرعا قوسسا، سوعىس جىلدارىنداعى وتتى ولەڭدەرىمەن جاۋىنگەرلەردىڭ جىگەرىن جانىدى. تولاعاي داستانشىلدىعىمەن قيساپسىز قيساشىلدىعى ءوز الدىنا. شوقتىعى بيىك تاعى ءبىر ونەرى ايتىستىڭ دا الاڭىن قىزدىرعاندىعى بارشاعا ايان.

كوپ قارعا تەڭ كەلمەيدى ءبىر سۇڭقارعا،

كوپ جىلقى تەڭ كەلمەيدى ءبىر تۇلپارعا.

جاقسىنىڭ ءارقاشان دا ءجونى بولەك،

جامان ادام جاراماس ءبىر قىمتارعا، – دەگەن ەكەن  حح عاسىردىڭ گومەرى اتانعان قازاقتىڭ ۇلى اقىنى جامبىل جابايەۆ. ءجونى بولەك جاقسىنىڭ تۋعانىنا ءجۇز ەلۋ جىل تولۋىن يۋنەسكو ۇيعارىمىمەن بۇكىل الەم مەرەيلى مەرەكەگە اينالدىرعان بولاتىن. بيىل، مىنە، اقىندىق ونەگەسى ۇرپاققا ۇلگى ۇلى جىراۋدىڭ 170 جىلدىعى دا حالىقارالىق كولەمدە ايشىقتى اتالىپ وتۋدە.

قازۇۋ رەكتورى عالىم مۇتانوۆ جامبىل مۇرالارىنىڭ قازۇۋ-دا زەرتتەلۋىنە ەرەكشە نازار اۋداردى: «جامبىل اقىندىق مۇراسى جانە جامبىلتانۋ وزەكتى ماسەلەلەرى قازۇۋ ادەبيەتشى عالىمدارىنىڭ نازارىنان ەشقاشان تىس قالعان ەمەس. اكادەميك-جازۋشى مۇحتار اۋەزوۆتەن باستالعان بۇل ءداستۇر كەشەگى حانعالي سۇيىنشالييەۆ، سۇلتانعالي سادىربايەۆ، الما قىراۋبايەۆا ەڭبەكتەرىنەن جالعاسىن تاپتى. بۇگىندە جانعارا دادەبايەۆ، مۇباراك ۇمبەتايەۆ، انارباي بۇلدىباي ت.ب. عالىمدار ىزگى ىزدەنىستەردى ودان ءارى دامىتىپ كەلەدى».

شوتا رۋستاۆەلي اتىنداعى گرۋزين ادەبيەتى ينستيتۋتىنىڭ ديرەكتورى يرما راتياني شوتا رۋستاۆەلي مەن جامبىل جابايەۆ شىعارمالارىنداعى ساباقتاستىقتى تىلگە تيەك ەتتى. ءحىى عاسىردا ءومىر سۇرگەن گرۋزيانىڭ مەملەكەت قايراتكەرى مەن قازاقتىڭ جىر الىبىنىڭ اراسىن قانشاما ۋاقىت ءبولىپ جاتىر، دەي تۇرعانمەن ولاردىڭ شىعارماشىلىعىنداعى ۇندەستىك ەكى ەل اراسىنداعى رۋحاني جاقىندىقتىڭ بەلگىسى. سەبەبى، پوەزيا ۋاقىتقا باعىنبايدى. «جيىرماسىنشى عاسىردىڭ ەكىنشى جارتىسىندا گرۋزيادا قازاق ادەبيەتىن وقۋ ۇلكەن داستۇرگە اينالعان بولاتىن. وكىنىشكە وراي، بۇگىنگى تاڭدا بۇل پروسەسس ءسال اقساپ قالدى. مەن، قازاقستانعا جامبىلدىڭ تويىنا ارنايى كەلدىم. دەگەنمەن، مەنىڭ تاعى ءبىر دىتتەگەن ديپلوماتيالىق مىندەتىم بار. ول قازاقستان مەن گرۋزيا اراسىندا ءبىلىم، عىلىم سالاسىنداعى ىنتىماقتاستىقتى ارتتىرۋ»، - دەپ اتاپ ءوتتى شوتا رۋستاۆەلي ەلىنىڭ وكىلى.

القالى جيىندا شەت ەلدەن كەلگەن عالىمداردان بولەك، ءا. دەربىسالى، ۋ.ق.قاليجانوۆ، ا.ت.قوجامقۇلوۆ، ج.شاشتاي ۇلى، گ.قۇرمانباي، ن. قاپالبەك ۇلى سياقتى قازاقتىڭ ءبىرتۋار ازاماتتارى سۇبەلى باياندامالارىن وقىدى.

كونفەرەنسيا اياسىندا فيلولوگيا جانە الەم تىلدەرى فاكۋلتەتىندە «جامبىل اتىنداعى قازاق فولكلورى مەن ادەبيەتىن زەرتتەۋ» ورتالىعى اشىلدى. سونداي-اق، ءال-فارابي اتىنداعى قازۇۋ-دىڭ عىلىمي كەڭەسىنىڭ شەشىمىمەن باسپاعا ۇسىنىلعان جامبىل جابايەۆتىڭ 2 تومدىق تاڭدامالى شىعارمالارىنىڭ تۇساۋكەسەر ءراسىمى ءوتتى.

«جامبىل – الەمدىك ادەبيەتتىڭ  التىن قورىندا  ماڭگىلىككە  قالىپ،  قازاق  دەگەن ۇعىممەن  قاتار  جۇرەتىن  دارەجەدە  ءوز شىعارمالارى  ارقىلى  كوتەرىلىپ، بيىكتە  تۇر. تەك، بىزدەر  ۇرپاقتارى  ولاردى – ۇلىلارىمىزدى سول بيىكتەن كورسەتە بىلەيىك، ءوزىمىز ۇساقتالىپ قالمايىق»، – دەدى كىتاپ مۇراجايىنىڭ ديرەكتورى، جازۋشى ناعاشىبەك قاپالبەك ۇلى.