ايتىسكەر اقىن اسپانبەك شۇعاتايەۆقا پاۆلودار وبلىسىنىڭ باسشىسى ق. بوزىمبايەۆ پاتەر بەرمەك بولعاندا قارسى شىققاندار دا تابىلىپتى، - دەپ جازادى aitysker.com سايتى oinet.kz – كە سىلتەمە جاساپ.

وتكەن جىلى بىرنەشە ايتىستا باس جۇلدە ۇتىپ، ارتىنشا «التىن دومبىرانى» قانجىعالاعان كەرەكۋلىك اقىن اسپانبەك شۇعاتايەۆقا پاۆلودار وبلىسىنىڭ بيلىگى پاتەر سىيلاپتى. ونى اقىننىڭ مىنا ولەڭدەرىن نەگىزگە الىپ اقپارات كوزدەرى جازدى.

بايبەك بەرگەن كولىكتى جۇرگىزگەن ەك،
بوزىمبايەۆ ءبىر ۇيگە كىرگىزگەن ەد.
ەندى وسى ۇيدە تۇراتىن ساۋلە شاشىپ،
اسپانعا ايداي سۇلۋ ءبىر قىز كەرەك!

راس وتىرىگىنە كوز جەتكىزۋ ءۇشىن اسپانبەكتىڭ وزىمەن حابارلاسقانىمىزدا ول پاتەردىڭ بەرىلگەنىن جاسىرمادى. ايتسە دە، اقىنعا باسپانانى ب ا ق وكىلدەرىن «شۋلاتپاي» بەرگەنى تاڭ قالدىرىپ وتىر. الدە شىنىمەن دە كۇندەستەردىڭ كوزىنە كۇيىك بولماسىن دەدى مە؟ ولاي دەيتىنىمىز، وتكەن جىلدىڭ سوڭىندا پاۆلودار وبلىسىنداعى ءبىر توپ اقىن جازۋشىلارعا گرانت تاپسىرۋ كەزىندە ايماق باسشىسى وسى ماسەلەنى قوزعادى. ول ءوزىنىڭ اقىن اسپانبەك شۇعاتايەۆتى جەكە قابىلداپ تانىسقانىن ايتتى. جانە الداعى ۋاقىتتا وعان وبلىس اتىنان پاتەر بەرۋ ماسەلەسى قارالىپ جاتقانىن ايتقان. تەك سول سىيلىققا كەيبىر زيالى قارسى بولىپ جاتقانىن دا جاسىرمادى.

— اسپانبەككە پاتەر بەرۋ تۋرالى ءسوز شىققاندا قارسى بولعاندار بولدى. «ول جاپ-جاس بولىپ قانداي ەڭبەك سىڭىرە قويىپتى. تالاي جىلدان بەرى ءبىز الا الماي جۇرگەندە؟»، دەگەن ءسوز جەتتى. سونى ايتقان ادام دا وسى جەردە وتىر، كوزىنە شۇقىماي-اق قويايىن،— دەگەن ەدى ق. بوزىمبايەۆ. مىنە، وسى ءبىر كورسەقىزارلىق اقىندى اشىق اسپەتتەۋگە كەدەرگى بولعان سياقتى. اسپانبەككە باسپانانى وبلىس اكىمىنىڭ ءوتىنىش جاساۋىمەن جومارت جاندار الىپ بەرىپتى.  بالكىم، ول كاسىپكەرلەر كوزگە تۇسكىلەرى كەلمەگەن شىعار.

جالپى، «التىن دومبىرا» ۇتىپ ايدى اسپانعا شىعارعان اسپانبەكتى دارىپتەۋ ءوزىنىڭ تۋعان وڭىرىندە كەم ءتۇسىپ جاتىر. مەكتەپتەر مەن كوللەدجدەردە جاستارمەن كەزدەسۋلەر وتكىزىپ، ونىڭ جەتىستىكتەرىن ۇلگى ەتسە اقىندىق ونەرگە قۇلشىنىس بىلدىرەتىن جاستار دا كوبەيەر ەدى. پاۆلودار وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى اينۇر سارسەنبايەۆا، بۇل ماسەلەنى ويلاستىرامىز دەپ ءسوز بەردى، تۇنەۋ كۇنى. جالىندى جاسقا كۇندەستىك تانىتقانشا جىگەر بەرگەن دۇرىس ەمەس پە؟!