جاقىندا ەلباسى نۇرسۇلتان نازاربايەۆ الماتىعا ساپارى بارىسىندا «گراند پارك» ساۋدا ورتالىعىندا بولىپ، بيزنەس نىسانىنىڭ جۇمىسىمەن تانىسقانى بەلگىلى. سول ساۋدا ورتالىعىن سالعان قۇرىلىسشىلار بۇگىن ەڭبەكاقىلارىن داۋلاپ نارازىلىق اكسياسىن ۇيىمداستىردى، - دەپ حابارلايدى «قامشى» پورتالى Tengrinews.kz – كە سىلتەمە جاساپ.

الماتىداعى التىنسارين داڭعىلى مەن قابدولوۆ كوشەلەرىنىڭ قيىلىسىندا اشىلعان ساۋدا ورتالىعىن سالۋعا قاتىسقان سۋبمەردىگەر كومپانيالاردىڭ 60-قا تارتا جۇمىسشىسى جالاقىلارىن بەرۋدى تالاپ ەتۋدە. ولار وتكەن جىلدىڭ قاراشا ايىنان بەرى ەڭبەكاقى كورمەگەندەرىن ايتىپ وتىر.

«ءۇش اي بويى «گراند پارك» عيماراتىن سالدىق. نىسان قۇرىلىسىن ۋاقىتىندا ءبىتىرۋ ءۇشىن كۇن-تۇن دەمەي جۇمىس ىستەدىك»، - دەيدى قۇرىلىسشىلاردىڭ ءبىرى قايرات زاكەرەيەۆ.

مەردىگەر كومپانيا باسشىلىعى بولسا، اتقارىلعان جۇمىس ءۇشىن تاپسىرىس بەرۋشىلەر تولىق ەسەپتەسىپ بولماعانىن ايتىپ، اقتالۋدا.

«ءبىز وسى جەردەگى «التىن بازار» عيماراتىنىڭ قۇرىلىسىندا بولدىق. باستاپقىدا سۋبمەردىگەر رەتىندە جۇمىس ىستەدىك، كەيىن باس مەردىگەر رەتىندە شاقىرىلدىق. بارلىق جۇمىستار ساۋدا ورتالىعىن وتكىزەتىن ۋاقىتقا ۇلگىرۋ ءۇشىن جىلدام سالىندى. ءبىز جۇمىستى اياقتاۋعا جاقىنداعاندا تاپسىرىس بەرۋشىلەر تاراپىنان شاعىمدار پايدا بولا باستادى. ءبىز بارلىق شاعىمداردى شەشىپ، نىساندى وتكىزدىك. ءبىراق، اتقارىلعان جۇمىستار تۋرالى اكتىگە ءالى قول قويماي وتىر»، - دەيدى مەردىگەر كومپانيا «سك-گرۋپپ نس» ج ش س جەتەكشىسى نيجات بازاكوۆ.

ن. بازاكوۆ 60 جۇمىسشىنىڭ الدىنداعى قارىز 10 ميلليون تەڭگە كولەمىندە ەكەنىن ايتقان. سونىمەن قاتار، الىنعان قۇرىلىسقا قاجەت ماتەريالداردىڭ اقىسى دا تولەنبەگەن.

«گراند پارك» اكىمشىلىگى بولسا، جۇمىستىڭ ساپاسىز ءارى ۋاقىتىنان كەشىگىپ اتقارىلعانىن ايتۋدا.

«سك-گرۋپپ نس» پەن «كانتري-ستروي» پروبلەما تۋعىزىپ وتىر. بۇگىنگە دەيىن ۋاقىتىندا تولەم جاسالىپ كەلد. ءبىراق، قازىرگى ۋاقىتتا اتقارىلعان جۇمىستار تۋرالى اكتىلەر جابىلمادى. ورىنداۋشىلىق قۇجاتتاما ءالى كۇنگە دەيىن ۇسىنىلمادى. «سك-گرۋپپ نس» ديرەكتورى تەلەفونعا مۇلدەم جاۋاپ بەرمەيدى. جۇمىس كولەمى تاپسىرىلمادى. بۇل ولاردىڭ ءوز جۇمىستارىمەن ىشكى ماسەلەلەرى. ءبىز سولاردىڭ ساپاسىز جۇمىسى ءۇشىن شىعىنعا باتتىق. ولار جۇمىستارىن تولىق اتقارماي، نىساندى تاستادى دا كەتىپ قالدى. مۇنداعى جۇمىستى باسقا ادامدار اياقتادى. بىزدە 100-دەن استام مەردىگەر كومپانيالار بار. ءبىراق، سولاردىڭ بىرىمەن ماسەلە بولماپتى»، - دەپ وتىر «گراند پارك» ساۋدا ورتالىعىنىڭ اكىمشىلىگىندەگىلەر.