- "ونەر جولى قيىن جول"، - دەيدى. قانشا جەردەن ونەر تۇتىپ تۇرسا دا، دەمەۋدىڭ قاجەت ەكەنى انىق. العاش اتامەكەنگە ورالعاندا سىزدەرگە دەمەۋشى بولعاندار بولدى ما؟
- اتامەكەنگە ەكى ەلدىڭ كەلىسىمشارتى بويىنشا، 1992 جىلى وقۋعا كەلىپ، 2 جىلدان كەيىن ءبىتىرىپ، ەلدە قالدىق. ونەردى ارى قاراي جالعاستىرۋ ءۇشىن ءتۇرلى شارالارعا قاتىسىپ، ونەردەگى ساۋاتىمىزدى ارتتىردىق. ەلدە قالۋىمىزعا نەگىزگى سەبەپ: ونەر جولىندا العاش باعىت كورسەتكەن ءانشى مايرا ءىلياسوۆا بولدى. ول كىسى ءانىمىزدى حالىق اراسىنا پاش ەتۋىمىزگە ۇلكەن جول اشا ءبىلدى.
- «قىزدار-اي» ءانشى اپايىمىز مايرا ءىلياسوۆانىڭ العاش قۇرعان توبى. وسى توپتىڭ قۇرىلۋى جونىندە ايتىپ بەرسەڭىزدەر...
- ءبىز العاش فيلورمونياعا كەلگەندە مايرا اپايىمىزبەن بىرگە ءار ءتۇرلى كونسەرتتەرگە شىعا باستادىق. سازگەر ءجاۋىر ارتىقبايەۆانىڭ «قىزدار-اي» اتتى ءانىن قوس داۋىسپەن ورىنداۋىمىزعا تۋرا كەلدى. «ءاندى ءۇش داۋىسقا سالىپ ورىنداپ كورەيىك»،- دەپ مايرا اپايىمىزعا ۇسىنىس جاساپ ەدىك، ول كەلىسىپ، بىرگە ايتا باستادىق. «قىزدار-اي» انىنەن بولەك التىنبەك قورازبايەۆ اعامىزدىڭ «قارا قىز، قارا قىز»، «ءومىر دە ءومىر، ءومىر –اي» جانە باسقا دا اندەردى بىرىگىپ ورىندادىق. سودان باستاپ، «قىزدار-اي» توبى حالىق اراسىنا تانىلا باستادى. مايرا اپايىمىزدان بولىنگەننەن كەيىن دە، «قىزدار-اي» بولىپ قالدىق. سەبەبى، ول حالىقتىڭ قويعان اتى.
- جەكە شىعارماشىلىقتارىڭىزدا قانداي جاڭالىقتار بار؟
- وبلىستىق فيلورمونيادان كەتىپ، جەكە شىعارماشىلىقپەن اينالىسا باستاعانىمىزعا ەكى جىلدان اسا ۋاقىت بولىپتى. ال، ءبىز ەلگە ورالعان 20 جىلدان استام ۋاقىتتى ەسكەرە وتىرىپ، الدىڭعى جىلى وبلىستىق مادەنيەت كۇنىنە وراي، ستۋدەنتتەر سارايىندا ءوزىمىزدىڭ جەكە ەسەپ بەرۋ كونسەرتىمىزدى وتكىزدىك. كونسەرتتە بۇرىنعى ايتىلىپ جۇرگەن اندەرىمىزدى جاڭالاپ، حالىققا ۇسىندىق. تاقىرىبى ەلگە، حالىققا ارنالعان اندەرىمىز نەگىزىندە «ەل تىلەگى» دەپ اتالدى. وسى اندەدەرىمىزبەن شىمكەنت، قوستاناي، اقتوبە وبلىستارىندا گاسترولدىك ساپاردا بولدىق. باسقا وبلىستارعا بارعاندا سول جەردە ساقتالعان كونە اندەردى جيناقتاي وتىرىپ، وڭدەۋ جاساپ، قورجىنىمىزدى تولتىرىپ جاتقان جايىمىز بار.
- قازىرگى تاڭدا «قىزدار-اي» توبىنىڭ انشىلەرى بولۋدان بولەك، باسقا قىزمەت اتقاراسىزدار ما؟
- ارينە، ونەر ادامدارىندا بوس ۋاقىت از بولاتىنى انىق. ەكەۋىمىز دە ءقازىر جەكە شىعارماشىلىق جولىندا جۇرگەن سوڭ، ءتىپتى دە ۋاقىتتىڭ بوس بولۋى مۇمكىن ەمەس. ەگەر ۋاقىت بولا قالسا، اينۇر ءوزىنىڭ جەكە وتباسىلىق جۇمىستارىمەن، بالا تاربيەسىمەن اينالىسادى. مەن بوس ۋاقىتىمدى بولاشاقتا شاكىرت تاربيەلەۋگە جۇمسايمىن.. سوڭعى ءبىر جىل كولەمىندە فيلورمونياداعى قىزمەتىمىزدى توقتاتا تۇرىپ، وزدەرىمىزدىڭ جەكە شىعارماشىلىق جۇمىسىمىزبەن اينالىسىپ جاتقان جايىمىز بار.
بىزدەر الماتى وبلىستىق ءسۇيىنباي اتىنداعى فيلورمونيادا جۇمىس ىستەپ جۇرگەنىمىزدە وكىمەت تاراپىنان پاتەر بەرىلدى. مۇنى ايتۋ سەبەبىمىز، شەتەلدەن كەلگەن قازاقتارعا دەگەن ۇلكەن قۇرمەت دەپ سەزىنەمىز. سونىمەن بىرگە، الماتى وبلىستىق مادەنيەت كۇندەرى شەتەلدەردە: كورەيادا، ماسكەۋدە، قىرعىزستاندا بولدىق. بۇنىڭ ءوزى وكىمەتتىڭ ونەرگە دەگەن دۇرىس كوزقاراسىن بايقاتسا كەرەك.
- تويعا شىعىپ تابىس تاباسىزدار ما؟ ەلگە ورالعاندا "قازاعىم ماعان بەرسىن ەمەس، ەلىمە نە بەرەمىن؟" دەگەن وي بولعان شىعار. سىزدەر قانداي ءبىر يگىلىكتى ءىس اتقاردىڭىزدار؟
- قازاق انشىلەرىنىڭ تويعا دەگەن قۇرمەتى، ارينە، ۇلكەن. حالىق ونەرىڭدى باعالاپ، جاقسى كورىپ تۇرسا، ءبىز ودان ەشقاشان قاشقان ەمەسپىز. توي - قازاقتىڭ بايلىعى. ارينە، ەلىمىز دەپ كەلگەننەن كەيىن ەلگە، جەرگە دەگەن قۇرمەت ءبىر بولەك بولسا، ەلگە بەرەر بارىمىز ونەر بولماق. ونەر جولىندا جۇرە وتىرىپ، ءتۇرلى قايىرىمدىلىق كونسەرتتەرىن جۇرگىزدىك. قارتتار ءۇيى، جەتىمدەر ءۇيى بولسىن، ءبىز بار ىنتامىزبەن ۋاقىت ءبولىپ، ول كىسىلەرمەن بايلانىستا بولدىق. بارعان ءاربىر وبلىستارداعى يگىلىكتى شارالاردى قالدىرمادىق. سەبەبى، حالىقتىڭ، ەلدىڭ قۇرمەتىنەن اسقان قۇرمەت جوق شىعار. ءبىزدىڭ دە العا قويعان ماقساتتارىمىزدىڭ ءبىرى وسى ەلگە دەگەن يگىلىكتى ءبىر كىشكەنە بولسا دا ءىس اتقارساق. ونىڭ ءوزى حالىققا كورسەتكەن قۇرمەتىمىز دەپ بىلەمىز.
- قازاق اندەرىن ناسيحاتتايتىن بىردەن-بىر توپسىزدار. ءبىراق، قازىرگى جاستاردا بۇرىنعى قازاق اندەرىنە دەگەن سۇرانىس از. ءوز اۋديتوريامىزدى ازايتىپ الامىز دەپ قورىقپايسىزدار ما؟
- مۋزىكا ءتىلى، ول ەشقاشان جەرگە، ۇلتقا، ناسىلگە قاراي تىڭداۋدى قاجەت ەتپەيدى. بەلگىلى ءبىر ءانشىنىڭ وزىندىك تىڭدارماندارى بولادى. ءبىز كوبىنە قازاق حالىق اندەرىن ايتامىز. ءبىراق، زاماناۋي تۇردە اندەردى وڭدەي وتىرىپ، ءوز تىڭدارماندارىمىزدى جالىقتىرماۋعا تىرىسامىز. مىسالى، گاسترولدىك ساپارىمىزعا جاستارمەن قوسا، ۇلكەن كىسىلەر دە كەلەدى. سول سەبەپتى، قاي ستيلدە بولماسىن اندەرىمىز دايىن دەۋگە بولادى. ونەر جولىنداعى ۇستاناتىن ماقساتىمىز: قانداي ورتا بولماسىن، جاندى داۋىسپەن ءان سالۋ. ويتكەنى، جۇرەكتەن شىققان ءان عانا جۇرەككە جەتەدى.
- الداعى ۋاقىتقا قويعان قانداي ماقساتتارىڭىز بار؟
- ءاربىر ونەر ادامى، نە باسقا ماماندىق يەسى بولسىن، وزدەرىنىڭ انىق ءبىر ماقساتى، ارمانى بولۋى كەرەك دەپ ويلايمىز. الدىنا ماقسات قويا بىلمەگەن ادام ارمانىنا جەتە المايدى. ءبىزدىڭ العا قويعان باستى ماقساتىمىز: قازاق اندەرىن بۇدان دا كوپ جيناي وتىرىپ، حالىققا ادەمى كۇيىندە جەتكىزۋ جانە بولاشاق شاكىرتتەر تاربيەلەۋ. سول ءۇشىن كوپ ەڭبەكتەنۋىمىز كەرەك.
سازدى اندەر:
[mp3player width=400 height=450 config=fmp_jw_widget_config.xml playlist=fmp_jw_widget_playlist.xml]
سۇحباتتاسقان ابدىبەك تولەۋبەك
