قازاق وپەراسىنىڭ جاۋھارى - مۇقان تولەبايەۆتىڭ "ءبىرجان - ساراسى" سانكت-پەتەربۋرگتەگى ماريين تەاترىنىڭ ەكىنشى ساحناسىندا قويىلادى دەپ حابارلايدى Tengrinews.kz "استانا-وپەرا" تەاترىنىڭ باسپا ءسوز قىزمەتىنە سىلتەمە جاساپ.

"ءبىرجان - سارا" تۇڭعىش رەت 1946 جىلدىڭ 7 قاراشاسىندا (كەيبىر دەرەكتەردە 7 قازاندا) الماتىداعى قازىرگى اباي اتىنداعى مەملەكەتتىك اكادەميالىق وپەرا جانە بالەت تەاترىندا قويىلعان. ءبىرجان مەن سارا پارتيالارىن ءانۋار ۇمبەتبايەۆ پەن كۇلاش بايسەيىتوۆا ورىندادى. قويىلىم 1948 جىلى رەسەيدە، ماسكەۋدەگى شىعارماشىلىق كۇشتەردىڭ سىناعىندا العاش رەت تانىستىرىلدى. ەندى ءبىرجان پارتياسىن ورىنداۋشى، ماريين تەاترىنىڭ ءسوليسى، رەسەيدىڭ ەڭبەك سىڭىرگەن ءارتىسى احمەد اعادي 10 ناۋرىزدا قازاقستان مەن تاتارستاننىڭ حالىق ءارتىسى، ق ر مەملەكەتتىك سىيلىعىنىڭ يەگەرى نۇرجامال ۇسەنبايەۆامەن جۇپ بولىپ ونەر كورسەتەدى. ليريكالىق-درامالىق شىعارمانىڭ ءداستۇرلى نۇسقاسى (قاجىم جۇمالييەۆتىڭ ليبرەتتوسى) قازاقتىڭ قوس تالانتتى اقىنى، ءانشى، جىرشى ءبىرجان مەن سارا اراسىنداعى رۋح پەن سۇيىسپەنشىلىك كۇشى جايلى باياندايدى، سونداي-اق، ءالدى مەن داۋلەتتىنىڭ جۇگەنسىزدىگى جايلى سىر شەرتەدى. ساحنالىق قويىلىم شىعارماشىلىق ەركىندىك پەن ءسۇيۋ قۇقىعىن دارىپتەيدى. وپەرانىڭ اقىرعى كورىنىسى - ءبىرجاننىڭ ءولىمى. ال رەسەيدىڭ حالىق ءارتىسى يۋريي الەكساندروۆ وپەراعا وزىنشە ءوڭ بەرگەن. ماريين تەاترىنىڭ رەجيسسەرى ءبىرجاننىڭ كورەرمەننىڭ كوز الدىنداعى ولىمىنەن باس تارتىپ، ول كورىنىستى اقىننىڭ حالىققا دەگەن ىقىلاسقا، جارقىن كەلەشەك جايلى ارمانعا تولى اندەرىمەن الماستىرادى. قويۋشى رەجيسسەر قازىرگى ۇرپاققا ەڭ الدىمەن جەكە باس دراماسى مەن ماڭگىلىك ماحاببات يدەياسىن جەتكىزۋدى ماقسات ەتكەن. Tengrinews.kz