«ۋرالسكايا نەدەليا» باسىلىمىنىڭ حابارلاۋىنشا، حالىقارالىق ايەلدەر مەيرامىنان سوڭ باتىس قازاقستان وبلىسىنا ەلباسى نۇرسۇلتان نازاربايەۆ ساپارلاپ بارماق. باسىلىمنىڭ ايتۋىنشا، بۇل جاڭالىق وبلىس باسشىلىعى ءۇشىن «كۇتپەگەن جاعداي» بولىپ وتىرعانى جانە بار.

مەرەكەدەنن سوڭ ورالعا اياق استىنان جەتىپ باراتىن ەلباسى وبلىس باسشىسىن ورنىنان الادى ەكەن. وبلىس باسشىسى نۇرلان نوعايەۆتىڭ لاۋازىمىنان الىنىپ، اتىراۋ وبلىسىنا اكىم بولىپ باراتىنى تۋرالى اڭگىمە وڭىردە جەلدەي ەسۋدە. بۇعان اتىراۋ وبلىسىنىڭ اكىمى باقتىقوجا ىزمۇحامەدوۆتىڭ «نۇر وتان» ءتىزىمى بويىنشا دەپۋتاتتىقتان ۇمىتكەر ەكەندىگى جانە ونىڭ سوڭعى حالىققا ەسەپ بەرۋ كەزدەسۋىندە بۇل لاۋازىمدا ۇزاق وتىرمايتىنىن اشىق ايتۋى دا سەبەپ بولىپ وتىرعان سىڭايلى.

اتىراۋ باسشىلىعىنا كەتەتىن ن. نوعايەۆتىڭ ورنىنا كىم كەلەتىنىن دە ايماقتاعى ساۋەگەيلەر وزدەرىنشە بولجاپ جاتقان كورىنەدى. بقو باسشىلىعىنا باستى ۇمىتكەردىڭ ءبىرى حالىق اسسامبلەياسى ءتوراعاسىنىڭ ورىنباسارى ەرالى توعجانوۆ بولسا، ەكىنشى ۇمىتكەر نوعايەۆتىڭ بۇرىنعى ءبىرىنشى ورىنباسارى، بۇگىندە پرەزيدەنت اكىمشىلىگىندە قىزمەت ىستەيتىن سەرىك شاپكەنوۆ كورىنەدى.

ەرالى توعجانوۆتى وبلىس اكىمدىگىنە ۇسىنۋشىلار وبلىستا اسسامبلەيا وتىرىسى وتەدى دەگەن جوسپارعا سۇيەنەتىن سەكىلدى. بۇل بولجامدى نەگىزسىز دەپ ايتۋعا جانە بولمايدى. ەرالى توعجانوۆ 2008 جىلدان بەرى اسسامبلەيا باسشىلىعىندا وتىر. سەگىز جىل بويى ءبىر ورىندا وتىرعان توعجانوۆتىڭ اكىمدىكتەن دامەسى جوق دەي المايسىز. بۇل قىزمەت وعان جانە جات ەمەس. ونىڭ 2001-2006 جىلدار ارالىعىندا قاراعاندى وبلىسى اكىمىنىڭ ورىنباسارى بولعانى بار. اسسامبلەيا ساياسي ۇيىم ستاتۋسىن يەلەنگەلى دە بىرنەشە سايلاۋ ءوتتى. توعجانوۆ وسى سايلاۋ ناۋقاندارىن ۇيىمداستىرۋ جۇمىسىندا دا بەيتاراپ قالدى دەۋگە كەلمەيدى. پرەزيدەنتكە ەلباسى مارتەبەسىن زاڭمەن بەكىتۋ، مەرزىمىنەن بۇرىن سايلاۋلار وتكىزۋ سىندى كوپتەگەن ساياسي باستامالارعا وسى اسسامبلەيا ۇيىتقى بولعانى بەلگىلى. وسى «ەڭبەگى» ءۇشىن پرەزيدەنت توعجانوۆقا اكىم تاعىن ۇسىنۋى ابدەن مۇمكىن.