بۇگىن قاراعاندىدا جەمقورلىق قىلمىستارعا قاتىسى بار دەلىنگەن بۇرىنعى پرەمەر-مينيستر سەرىك احمەتوۆ جانە 11 ادامنىڭ اپەللياسيالىق شاعىمىن قاراۋ بويىنشا سوت وتىرىسى ءوتتى، - دەپ حابارلايدى «قامشى» پورتالى.

سوتتالعانداردىڭ قورعاۋشىلارى جاساعان مالىمدەمەلەر تىڭدالعان سوڭ، پروكۋرورلار قورىتىندى ازىرلەۋگە قوسىمشا ۋاقىت سۇراپ، سۋديا ەرتەڭگى ساعات 15.00-گە دەيىن ءۇزىلىس جاريالاعان.

بۇگىن تاڭەرتەڭ باستالعان سوت وتىرىسىنا سەرىك احمەتوۆ تە، باس بوستاندىعىنان ايىرۋ جازاسى كەسىلگەن باسقا تۇلعالار دا قاتىسپادى. اپەللياسيالىق سوت وىتىرىسىنا قورعاۋشىلار مەن باس بوستاندىعىنان شارتتى تۇردە ايرىلعاندار عانا قاتىستى.

سەرىك احمەتوۆتىڭ قورعاۋشىسى نيكولاي لەسنيك ەكس-پرەمەردىڭ وزىنە تاعىلعان ايىپتارمەن ەش كەلىسپەيتىنىن، الايدا، قاراعاندى وبلىسىنىڭ اكىمى، پرەمەر-مينيستر لاۋازىمىندا جۇرگەندە ءبىرقاتار لاۋازىمدى تۇلعالاردىڭ بيۋدجەت قارجىسىنا قول سالعانىن قاداعالاي الماعاندىعىن مويىندايتىنىن ايتتى.

«مەنىڭ قورعاۋىمداعى س. احمەتوۆ ەلباسىنىڭ ارتقان سەنىمىن اقتامايمىن دەپ ەش ويلاماعان. سوندىقتان، ول بولعان جاعدايعا بايلانىستى جاۋاپكەرشىلىكتەن قاشپايدى جانە بولعان جاعدايعا بايلانىستى كىناسى بارىن مويىندايدى، وعان شىن قىنجىلادى»، - دەدى ن. لەسنيك.

«ءبىزدىڭ قورعاۋىمىزداعى س. احمەتوۆ قاراعاندى وبلىسىنىڭ اكىمى، سونداي-اق، پرەمەر-مينيستر لاۋازىمىن اتقارعان كەزدە جەكەلەگەن تۇلعالاردىڭ قاراعاندى وبلىسى اۋماعىندا جاسالعان زاڭسىز ارەكەتتەرى سالدارىنان مەملەكەت مۇددەسىنە ماتەريالدىق شىعىن كەلگەنىن تولىق باقىلاي الماعانىن جانە سوعان جول بەرگەنىن مويىندايدى»، - دەدى ول.

ال، قاراعاندى وبلىسىنىڭ بۇرىنعى اكىمى باۋىرجان ابدىشيەۆتىڭ قورعاۋشىسىنىڭ سوت زالىنا ب. ابدىشيەۆتى الدىرتۋ تۋرالى ءوتىنىشىن سوت قاناعاتتاندىرماي تاستادى.

3 جىل مەرزىمگە سوتتالعان تاعى ءبىر شەنەۋنىك، قاراعاندى وبلىسى اكىمىنىڭ ورىنباسارى بولعان عابيت مۇحامبەتوۆتىڭ قورعاۋشىسى سۋديادان ع. مۇحامبەتوۆتىڭ كاملەتتىك جاسقا تولماعان بەس بالاسى بارىن، ايەلى التىنشىسىنا تاعى جۇكتى ەكەنىن ەسكەرۋدى سۇرادى.

كەشە ءبىرقاتار اقپارات قۇرالدارىندا س. احمەتوۆتىڭ دوستارى مەن تۋىستارى مەملەكەتكە كەلتىرىلگەن شىعىن دەپ باعالانعان 2،2 ملرد تەڭگەنى قازىناعا اۋدارعانى تۋرالى جازعان بولاتىن.