اقپان ايىنىڭ باسىندا جول اقىسىن تولەۋدەن باس تارتقان ەكى جولاۋشى سوققىعا جىعىپ، ءبىر كوزىنەن ايرىلدى دەلىنگەن اۆتوبۋس جۇرگىزۋشىسى پوليسياعا جالعان مالىمەت بەرگەن، - دەپ حابارلايدى «قامشى» پورتالى الماتى قالاسى ءىىد باسپا ءسوز قىزمەتىنە سىلتەمە جاساپ.
«اتالعان ءىس بويىنشا قك 293-بابىمەن تەرگەۋ باستالعانىن حابارلاعانبىز. تەرگەۋ بارىسىندا جابىرلەنۋشى بەلگىسىز ەكى ەر كىسى ۇرىپ كەتتى دەگەن بولاتىن. سوققىعا جىعۋ سەبەبىن جۇرگىزۋشى بەلگىلەنگەن تارتىپپەن جول اقىسىن تولەۋدەن باس تارتۋ دەپ تۇسىندىرگەن ەدى.
اتالعان قىلمىستى تەرگەۋ بويىنشا قۇرىلعان توپ جابىرلەنۋشىنىڭ جالعان مالىمەت بەرگەنىن جانە تەرگەۋدى باسىنان باستاپ باسقا باعىتقا بۇرىپ جىبەرگەنىن انىقتادى. شىن مانىندە جابىرلەنۋشىنى ءوزىنىڭ تۋعان جيەنى سوققىعا جىققان»، - دەلىنگەن باسپا ءسوز قىزمەتى تاراتقان حابارلامادا.
تەرگەۋ بارىسىندا جۇرگىزۋشىنى 33 جاستاعى تۋىسى ماتەريالدىق كەلىسپەۋشىلىك سالدارىنان سوققىعا جىققانى انىقتالعان. كۇدىكتى ناعاشىسىنىڭ وعان ءىرى كولەمدە اقشا قارىز بولعانىن ايتقان.
سونداي-اق، ءىىد باسپا ءسوز قىزمەتى ماسەلەنىڭ ءمان-جايى انىقتالعان سوڭ جابىرلەنۋشىنىڭ وزىنە قول جۇمساعان تۋىسىن جاۋاپكەرشىلىككە تارتپاۋ تۋرالى ءوتىنىش بەرگەنىن حابارلايدى.
«جاقىن كۇندەرى وسى وقيعا بويىنشا پروسەسسۋالدىق شەشىم قابىلدانىپ، ارىزدانۋشىنىڭ ارەكەتتەرىنە قۇقىقتىق باعا بەرىلەتىن بولادى»، - دەيدى مەدەۋ اۋداندىق ءىىب باستىعى پوليسيا پولكوۆنيگى ەرلان ورالبەكوۆ.
بۇعان دەيىن ءبىز اتالعان جۇرگىزۋشىنىڭ دەنساۋلىعىنا كەلتىرىلگەن زيان ءۇشىن «وڭاي» ەلەكتروندى بيلەتتەندىرۋ جۇيەسىن ەنگىزگەن كومپانيادان 5 ميلليون تەڭگە وتەماقى تالاپ ەتكەنىن جازعان بولاتىنبىز.
