بيىل «قازاقستان» ۇلتتىق تەلەارناسىندا وسى جىلدىڭ ۇزدىك مەگا-جوباسى – «مۋزارت LIVE» تۇساۋىن كەسپەك، - دەپ حابارلايدى «قامشى» پورتالى ۇلتتىق ارنانىڭ باسپا ءسوز قىزمەتىنە سىلتەمە جاساپ.

باعدارلامادا حالىق سۇيىسپەنشىلىگىنە بولەنىپ، جۇرەگىن جاۋلاعان «مۋزارت» توبى ءوز ءىزباسارلارىن ەل اراسىنان ىزدەيدى.

 «قازاقستان» ارناسىنان كورسەتىلەتىن مەگا-جوبانىڭ جۇرگىزۋشىلەرى -  بەلگىلى اكتەر ازامات ساتىبالدى، جاس اكتەر، تەلەجۇرگىزۋشى نۇرسۇلتان ەسجان مەن جۋرناليست – دينا تولەپبەرگەن؛ پروديۋسەرى – رەنات گايسين.

«مۋزارت LIVE» مۋزىكالىق تەلەجوباسىنا 16 جاستان 25 جاسقا دەيىنگى ارالىقتاعى تالانتتى ەر جىگىتتەر قاتىسا الادى. ۇمىتكەرلەردىڭ مۋزىكالىق ءبىلىمىنىڭ بولۋى شارت ەمەس. سونداي-اق، مۋزىكالىق تالعامى مەن ورىنداۋشىلاردىڭ قۇرامىنا دا (سولو، دۋەت، توپ) ءمان بەرىلمەيدى. ەڭ باستى تالاپ – قاتىسۋشى قازاق تىلىندە ءان ايتا بىلۋگە مىندەتتى.

«مۋزارت LIVE» مۋزىكالىق بايقاۋى 3 كەزەڭنەن تۇرادى  دەيدى ۇيىمداستىرۋشىلار.

ءى كەزەڭ – ونلاين ىرىكتەۋ (كاستينگ) 15ء-شى ناۋرىزدان 15ء-شى ءساۋىر ارالىعىندا وتەدى ( ونلاين ءوتىنىش بەرگەن ۇمىتكەرلەردىڭ جۇمىسى قارالادى).

ءىى كەزەڭ – ايماقتىق ىرىكتەۋ «مۋزارت» توبىنىڭ قاتىسۋىمەن وتپەك. بايقاۋدىڭ ايماقتىق ىرىكتەۋ كەزەڭى 10-شى مامىردان 25ء-شى مامىر ارالىعىندا قازاقستاننىڭ 5 قالاسىندا -  استانا، الماتى، اتىراۋ، سەمەي جانە شىمكەنتتە وتەدى.

ەكىنشى كەزەڭ بىتكەننەن كەيىن قازىلار القاسى 2 اپتانىڭ ىشىندە بايقاۋدىڭ ءۇشىنشى كەزەڭىنە جولداما الاتىن 60 ۇمىتكەرلەردىڭ ەسىمىن جاريالايدى. ۇلتتىق مۋزىكالىق تەلەجوبانىڭ ءىىى كەزەڭى ۇمىتكەرلەرگە تەلەتۇسىرىلىمگە قاتىسۋ مۇمكىندىگىن بەرەدى.

ءىىى كەزەڭگە وتكەن ۇمىتكەرلەر ستيل، يميدج، رەپەرتۋار، حورەوگرافيا سالاسى بويىنشا ۇيىمداستىرۋ كوميتەتىنەن كەڭەس الادى دەپ جوسپارلانىپ وتىر. اقتىق سىندا بار-جوعى 6 ادام باعىن سىنايدى.

قاتىسۋ ەرەجەسى بويىنشا تولىق اقپاراتتى www.kaztrk.kz، www.viamuzart.kz رەسمي سايتتارىنان، جوبانىڭ @muzartlive_official رەسمي instagram پاراقشاسىنان الۋعا، سونداي-اق ونلاين وتىنىشتەردى show@muzart.kz ە-mail ادرەسىنە جولداۋلارىڭىزعا بولاتىنىن حابارلايمىز.

تەك ۇزدىكتەر ۇزەڭگى قاعىستىراتىن ءدۇبىرلى دودانىڭ كۋاسى بولاتىن كۇن دە الىس ەمەس. جاڭا جوبا – جاڭا بەلەستى ۇلتتىق ارنادا تاماشالاڭىزدار! وتە قىزىقتى بولارىنا ۋادە بەرەمىز! ال ازىرشە، سىزدەردىڭ كاستينگكە قاتىسۋعا مۇمكىندىكتەرىڭىز بار.

ءبىز ءوز كەزەگىمىزدە، جوبا ۇمىتكەرلەرىنە تەك ساتتىلىك تىلەيمىز!