اتەشسىز دە تاڭ اتادى نەمەسە ءماجىلىسسىز وتە شىققان ەكى اي
اتا زاڭعا ساي ءماجىلىس – بيلىكتىڭ تۇتاس تا تەگەۋرىندى ءبىر تارماعى! ول ورگانسىز كەز كەلگەن وركەنيەتتى مەملەكەتتىڭ كۇنى قاراڭ: زاڭدار قابىلدانباي قالادى، ۇكىمەتكە «ءاي، دەپ، قوي دەپ» قاتقىل سويلەيتىن قۇرىلىم بولماي، ەلدى بەرەكەسىزدىك جايلايدى. باسقاسىن ايتپاعاندا، سايلاۋشىلار وزدەرى قالاپ، سايلاپ العان دەپۋتاتتارىن ساعىنىپ، ىزدەي باستايدى.
ال، بىزدە بولسا، راحات! ءماجىلىستىڭ وز-وزىنە قول جۇمساپ، ساياسي سۋيسيد جاساعانىنا ەكى ايدىڭ ءجۇزى بولدى. «قايران مەنىڭ دەپۋتاتتارىم! ارىستاي مەنىڭ پارتيالارىم!» دەپ، قايعىرىپ جاتقان ەل دە جوق. ءتىپتى، بيلىك ءماجىلىستىڭ جانازاسىن ءوزى شىعارعانىمەن، ونىڭ قىرقىن بەرۋدى دە ۇمىتىپ كەتىپتى!
اتەشسىز دە تاڭ اتادى، ونىڭ ۇستىنە ءبىزدىڭ اتەشتىڭ سول تاڭدى شاقىراتىن داۋىسى دا جوق!
سول سياقتى، وسىنداي بەيشارا، يا بار، يا جوقتىعى سەزىلمەيتىن ءماجىلىسسىز دە كادىمگىدەي ءومىر سۇرۋگە بولادى ەكەن عوي. ءماجىلىسسىز دە ەكونوميكامىز «قارىشتاپ» دامىپ جاتىر، ەلباسىنىڭ ءوزى بارىپ اشاتىن گيپەرماكەتتەر كۇن ساناپ كوبەيىپ جاتىر! ەلباسىنىڭ ساپارلارىنىڭ كەزىندە ءبىر دە ءبىر ازامات: «نۇرەكە! دەپۋتاتتارسىز كۇنىمىز قاراڭ ەكەن! سول يگى جاقسىلاردى مەيلىنشە تەزىرەك قۇتتى ورىندارىنا قايتا قوندىرىڭىزشى!» دەپ ءوتىنىپ تە جاتقان جوق!
پرەزيدەنت اكىمشىلىگىنىڭ قۇقىقتىق باسقارماسى بار ەمەس پە؟! دەپۋتاتتاردى سايلاپ، جۇيكەنى توزدىرىپ، قارجى شاشىپ، جۇرتتى تالاستىرىپ قويعانشا، سول باسقارماعا زاڭداردى راسىمدەۋ مىندەتىن جۇكتەپ قويساق بولماي ما؟
ارينە، بۇل ۇسىنىسىم اتا زاڭعا قايشى. ءبىراق بىزدە ونداي قايشىلىققا كىم قاراپ جاتىر؟ ونىڭ ۇستىنە كونستيتۋسياسىن ەكى-ۇش مينۋتتا وزگەرتە سالاتىن ەل ەمەسپىز بە؟
ءامىرجان قوسانوۆتىڭ فەيسبۋكتەگى پاراقشاسىنان الىندى.
پىكىر قالدىرۋ