14-15 ناۋرىز كۇندەرى ءال-فارابي اتىنداعى قازاق ۇلتتىق ۋنيۆەرسيتەتىندە قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «ستۋدەنتتىك كوكتەم-2016» بايقاۋىنىڭ اقتىق سىنى بولىپ ءوتتى. العاشقى كۇنى ستۋدەنتتەر بي نوميناسياسى بويىنشا باقتارىن سىناسا، 15 ناۋرىزدا ءان بايقاۋى مەن مۋزىكالىق اسپاپتاردا ورىنداۋشىلار سايىسى ورىن الدى. بۇل تۋرالى «قامشى» پورتالى قازۇۋ باسپا ءسوز قىزمەتىنە سىلتەمە جاساپ حابارلايدى.
«ستۋدەنتتىك كوكتەم-2016» بايقاۋىنىڭ باستى ماقساتى – ستۋدەنتتەردىڭ شىعارماشىلىق قابىلەتتەرىن شىڭداۋ، ولاردى تەك ءبىلىم مەن عىلىمعا عانا ەمەس، ونەرگە باۋلۋ، تالانتتاردىڭ تانىلۋىنا ىقپال ەتۋ بولىپ تابىلادى. تاۋەلسىزدىكتىڭ 25 جىلدىعىنا وراي ۇيىمداستىرىلىپ وتىرعان بۇل «ستۋدەنتتىك كوكتەم» دە ءدال وسى ماقساتتا وتكىزىلدى دەسەك ارتىق ايتقانىمىز ەمەس.
«ستۋدەنتتىك كوكتەم-2016» بايقاۋىنىڭ العاشقى كەزەڭىنە ۋنيۆەرسيتەت بويىنشا 2000-نان اسا ستۋدەنت قاتىسىپ، ونىڭ مىڭعا جۋىعى كەلەسى كەزەڭگە جولداما العان بولاتىن. اتالعان بايقاۋدىڭ العاشقى كۇنىندە بي نوميناسياسى بويىنشا ەكى كەزەڭنەن سۇرىنبەي وتكەن بيشىلەر ونەر كورسەتتى. قازىرگى زاماناۋي بي، پاتريوتتىق فلەشموب تاقىرىبى اياسىندا بيلەگەن جاستاردىڭ اراسىندا كورەرمەندەرگە ەرەكشە اسەر قالدىرا بىلگەن فاكۋلتەت – حيميا جانە حيميالىق تەحنولوگيالار فاكۋلتەتى بولدى. الايدا، جۇيرىكتەن جۇيرىك وزار جارىسقاندا دەمەكشى، اتالعان فاكۋلتەتتەن گەوگرافيا جانە تابيعاتتى پايدالانۋ فاكۋلتەتى دە قالىسقان جوق. وسى ورايدا، وزدەرىن ساحنادا اسەم كورسەتە بىلگەن مەحانيكا-ماتەماتيكا فاكۋلتەتىن دە اتاپ وتكەنىمىز ءجون. اتالعان كۇنى بارلىق فاكۋلتەت ستۋدەنتتەرى ءوز ونەرلەرىن كورەرمەندەرگە پاش ەتىپ، ولاردىڭ ىستىق ىقىلاسىنا بولەندى.
«ستۋدەنتتىك كوكتەمنىڭ» كەلەسى كۇنى جەز تاڭداي انشىلەرگە ارنالعان «بىرگە – كەمەل كەلەشەككە!» اتتى ءان بايقاۋى مەن «تاۋەلسىزدىك – تۇعىرىم!» اتتى مۋزىكالىق اسپاپتاردا ورىنداۋشىلار بايقاۋىنا ۇلاستى. قازۇۋ ونەرپازدارىنىڭ تالانتىن تانىتا ءتۇسۋ ماقساتىندا وتكىزىلگەن بۇل بايقاۋدىڭ ەكىنشى كۇنىندە ءادىل-قازىلار القاسىندا قازاق ەستراداسىنىڭ جارىق جۇلدىزى مەرۋەرت تۇسىپبايەۆا، «قۇرمانعازى» اتىنداعى ۇلتتىق كونسەرۆاتوريانىڭ وقىتۋشىسى سەرىك پازىلوۆ، «گاۋحارتاس» توبىنىڭ ءسوليسى اسەم ابدۋالييەۆا، «ارلان» توبىنىڭ ءسوليسى ءبىرجان جۇنىسبەكوۆ جانە ءانشى بوتا بيسەنوۆا بولدى.
ادەمى ارلەنگەن ساحنا مەن كورەرمەندەردىڭ ىستىق ىقىلاسى ونەرپاز ستۋدەنتتەردى دە ءبىر قۋانتتى. بارلىق فاكۋلتەت بىلىمگەرلەرى ب ا ق سىناپ جاتقان بۇل بايقاۋدا اسەم ءان دە شىرقالدى، كەرەمەت كۇي دە ورىندالدى. سولاردىڭ قاتارىندا، قۇلاقتان كىرىپ بويدى العان اسەم ءان ۇسىنعان گەوگرافيا جانە تابيعاتتى پايدالانۋ فاكۋلتەتىنىڭ 1-كۋرس ستۋدەنتى سارسەنبەكوۆ ماعجاندى «تۋعان جەر» انىمەن، بيولوگيا جانە بيوتەحنولوگيا فاكۋلتەتىنىڭ 1-كۋرس ستۋدەنتى تۇرسىنبايەۆا سامالدى «ءىزىن كورەم» انىمەن، جۋرناليستيكا فاكۋلتەتىنىڭ 2-كۋرس ستۋدەنتى تۇزەلباي ابايدى «وتان انا» انىمەن ەرەكشە اتاپ وتۋگە بولادى.
سايىستا قازاقتىڭ قارا دومبىراسىن كۇمبىرلەتكەن ورىنداۋشىلار دا از بولمادى. اتاپ ايتساق، فيزيكا-تەحنيكالىق فاكۋلتەتىنىڭ 1-كۋرس ستۋدەنتى زادىگەرەيەۆ ءالىمجان، شىعىستانۋ فاكۋلتەتىنىڭ 1-كۋرس ستۋدەنتى تاستانبەكوۆا ايكۇمىس قۇرمانعازىنىڭ «اداي» كۇيىن ناقىشىنا كەلتىرە ورىندادى. ودان وزگە، «بالبىراۋىن»، «جەڭىس»، «18 جاسار بالجان قىز»، «سالتانات»، «جۇمىرقىلىش»، «كوروعلى»، «شاتتانامىن»، «جيما» ءاندى كۇيلەر ورىنداۋشىلاردىڭ نازارىنان تىس قالمادى. بۇل سىندا تالانتتى جاستار دومبىرامەن قوسا، قوبىز، فورتەپيانو سىندى مۋزىكالىق اسپاپتاردا دا ونەرلەرىن كورسەتتى.
وسىلايشا، كوپتەن كۇتكەن «ستۋدەنتتىك كوكتەم-2016» بايقاۋىنىڭ فينالى دا ءوز مارەسىنە جەتتى. ال جۇزدەن جۇيرىك، مىڭنان تۇلپار ۇزدىك ورىنداۋشىلار جۋىردا بولاتىن گالا كونسەرتتە ماراپاتتالاتىن بولادى. اقتىق سىنعا سۇرىنبەي جەتكەن ونەرپازدارىمىزعا ساتتىلىك تىلەيمىز.
ۇلجان يبرايم
پىكىر قالدىرۋ