اقش پرەزيدەنتى باراك وباما مەن مەملەكەتتىك حاتشىسى دجون كەرري قازاقستان ناۋرىز مەيرامىمەن قۇتتىقتادى، - دەپ حابارلايدى «قامشى» پورتالى اقش-تىڭ قازاقستانداعى ديپلوماتيالىق ميسسياسىنا سىلتەمە جاساپ.
«مەن پرەزيدەنت وبامانىڭ تىلەكتەرىنە قۋانا قوسىلامىن. الەمدەگى وسى مەرەكەنى اتاپ وتەتىن بارلىق دوستارىمىزعا باقىت، دەنساۋلىق پەن مولشىلىققا تولى ناۋرىز تىلەيمىن. ءبىز، بارلىق امەريكاندىقتارمەن بىرگە يران يسلام رەسپۋبليكاسىنداعى، ورتالىق ازيا مەن كاۆكازداعى جانە وسى اقش-تاعى جاڭا جىل مەن كوكتەم مەرەكەسىن قارسى الۋشىلارمەن بىرگە قۋانامىز»، - دەلىنگەن اقش مەملەكەتتىك حاتشىسى تاراتقان حابارلامادا.
بۇدان باسقا، دج. كەرري «ناۋرىز جاڭارۋ مەن ىمىرالاسۋ ۋاقىتى، بارلىق وتباسىلاردىڭ كوكتەمنىڭ كەلۋىن مەرەكەلەۋ مۇمكىندىگى، وتكەن ون ەكى ايدى سارالاپ، الداعى جىلعا ۇمىتپەن قارايتىن مەزگىل ەكەنىن» اتاپ ءوتتى.
بۇعان دەيىن اقش-تىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى دجوردج كرول دا قازاق حالقىن ناۋرىز مەيرامىمەن قۇتتىقتاعان بولاتىن.
«قۇرمەتتى قازاقستاندىقتار! قازاقستانداعى اقش ەلشىلىگى اتىنان سىزدەردى ناۋرىز مەرەكەسىمەن قۇتتىقتايمىن. مىڭداعان جىلدار بويى ناۋرىزدا تۋىستار مەن دوستار جاڭا كوكتەمدى قارسى الۋ ءۇشىن باس قوسادى. وسى كوكتەم مەرەكەسى قارساڭىندا سىزدەرگە جانە وتباسىلارىڭىزعا دەنساۋلىق، باقىت پەن ىرىس، بەرەكە تىلەيمىن»، - دەدى ءوز قۇتتىقتاۋىندا دج. كرول مىرزا.
پىكىر قالدىرۋ