ەلوردادا ناۋرىز مەيرامىنا وراي حالىقتىق سەرۋەندەر ءوتىپ جاتىر. مەرەكە ەكى كۇن بويى تويلانادى، - دەپ حابارلايدى «قامشى» پورتالى استانا قالاسىنىڭ رەسمي سايتىنا سىلتەمە جاساپ.

«استانا-ارەنا» ستاديونىندا وتكەن مەرەكەلىك شارانىڭ باستالۋىنا ەلباسى نۇرسۇلتان نازاربايەۆ قاتىسىپ، وندا ازىرلەنگەن ەتنو-اۋىلدى ارالادى.

«وسىناۋ ىزگى مەرەكە پارلامەنت سايلاۋىن وتكىزۋ شاراسىمەن قاتار كەلدى. قازاقستاندىقتار ءبىر ءۇيدىڭ بالاسىنداي تۇتاستىعىن كورسەتتى. حالقىمىزدىڭ وسى بىرلىگى مىزعىمايتىن بولسىن. ءبىزدىڭ جاساپ جاتقانىمىزدىڭ ءبارى قازاقستاندىقتاردىڭ كەيىنگى ۇرپاعىنا مۇرا بولىپ قالادى. ءبىزدىڭ بولاشاققا اپاراتىن جولىمىز زور جەتىستىكتەر مەن تاۋەلسىزدىگىمىزدىڭ يگىلىكتەرى ارقىلى جارقىراپ تۇراتىن بولسىن. بارشا تابيعات جاڭارعان ناۋرىز مەرەكەسىندە ادامدار ءاردايىم بىر-بىرىنە دەگەن وكپە-رەنىشىن كەشىرگەن، مۇقتاجدارعا كومەكتەسكەن، باقىت تىلەپ، اعاش وتىرعىزعان جانە بۇلاق كوزىن اشقان. حالىق بۇل كۇنى تىلەگەن تىلەكتەر مىندەتتى تۇردە ورىندالاتىنىن ايتادى. مەن ءاربىر شاڭىراققا باقىت، شاتتىق شۋاعىن جانە بار جاقسىلىقتى تىلەيمىن، – دەدى قازاقستان پرەزيدەنتى. 

باستى شارالاردىڭ ءبىرى «قازاق ەلى» مونۋمەنتى الدىنداعى الاڭدا ءوتتى. ادەتتەگىدەي، كيىز ۇيلەر تىگىلىپ، سپورت جارىستارى ۇيىمداستىرىلدى، التىباقان ورناتىلىپ، كونسەرتتىك باعدارلاما كوپشىلىك نازارىنا ۇسىنىلدى.

«جىل سايىن كيىز ۇيلەر تىگىپ، باۋىرساق تاراتامىز، ناۋرىز كوجە مەن قىمىز ۇسىنامىز. كيىز ۇيلەردە داستارحاندار جايىلدى. ەڭ باستى مەرەكەلەردىڭ ءبىرى - گۇلدەنۋ مەن حالىق بىرىگەتىن كۇن. بۇگىن قوناقتاردى تاڭعى ساعات 8-دەن باستاپ قارسى الۋدامىز. ۇلكەن-كىشىنىڭ بارلىعى كەپ جاتىر»، - دەدى قالالىق باسقارمالاردىڭ وكىلدەرىنىڭ ءبىرى ايمان شىنبايەۆا.

حالىق اراسىندا كۇرەس، گىر سپورتى، ارمرەستلينگ، ارقان تارتۋ، اسىق اتۋ جارىستارى وتكىزىلدى. قالالىق مادەنيەت مەكەمەلەرى ادامدارعا مەرەكەلىك كوڭىل كۇي سىيلاۋدا. جاس تەاتر ارتىستەرى استانالىقتاردىڭ نازارىنا تاقىرىپتىق كورىنىستەر ۇسىنۋدا.

مەرەكەلىك شارالار «بايتەرەك» مونۋمەنتىنىڭ الدىنداعى الاڭدا، سونداي-اق، قالالىق الاڭدا دا ءوتىپ جاتىر. قالالىق قىزمەتتەر كيىز ۇيلەر تىگىپ، تاتتى-دامدىلەر تاراتىپ، ساندىك بۇيىمداردى كوپشىلىككە كورسەتۋدە.

ايتا كەتەيىك، ەلوردادا حالىقتىق سەرۋەن ەرتەڭ دە وتەدى. مەرەكەلىك شارالار «ستۋدەنتتىك» جانە «جەرۇيىق» پاركتەرىندە، «استانا-ارەنا» ستاديونى جانىنداعى ەتنواۋىلدا، قالالىق الاڭدا، قازاق ەلى مونۋمەنتىنىڭ جانە بايتەرەك مونۋمەنتىنىڭ جانىنداعى الاڭداردا ۇيىمداستىرىلادى.