قازاقستان رەسپۋبليكاسى قارۋلى كۇشتەرى جوعارعى باسقولباسشىسى ن. نازاربايەۆتىڭ تاپسىرماسىمەن 27 ناۋرىز كۇنى تۇنگى ساعات بىردە دابىل سوعىلىپ، جامبىل وبلىسىنداعى اسكەري بولىمدەر جاۋىنگەرلىك ازىرلىكتىڭ جوعارى دەڭگەيىنە كەلتىرىلدى، - دەپ حابارلايدى «قامشى» پورتالى قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

اتالعان اسكەري شارا بارىسىندا قورعانىس ۆەدومستۆوسىنىڭ باسشىسى يمانعالي تاسماعامبەتوۆ 03811 (قۇلان اۋىلى)، 91678 (باۋىرجان مومىش ۇلى اۋىلى)، 85395 (تاراز قالاسى) اسكەري بولىمدەرىنىڭ جانە «تەرىس-اشىبۇلاق» پوليگونىنىڭ جاۋىنگەرلىك ازىرلىگى مەن قابىلەتتىلىگىنىڭ دەڭگەيىن تەكسەردى.

بۇل بولىمشەلەر بەلگىلەنگەن ۋاقىت مەرزىمىندە «تەرىس-اشىبۇلاق» پوليگونىنا جينالىپ، قويىلعان مىندەتتەردى ورىندادى. سونداي اق، جىلجىمالى باسقارۋ پۋنكتى، بايلانىس جەلىسى جانە باسقا دا قۇرىلىمدار ورناتىلدى.

85395 اسكەري بولىمىندە (تاراز قالاسى) تەكسەرىستىڭ قورىتىندىسى شىعارىلىپ، وندا بولىمدەردىڭ جيناقىلىعى مەن ۇتقىرلىعى جانە ولاردىڭ بەلگىلەنگەن ارا-قاشىقتىقتى جەدەل ەڭسەرۋ مۇمكىندىگى تەكسەرىلدى. كەنەتتەن تەكسەرىستىڭ باستى ماقساتى اسكەري بولىمدەر مەن ونىڭ قۇرىلىمدارىنىڭ توتەنشە جاعدايلار، لاڭكەستىك ارەكەتتەر ءقاۋپى تونگەندە جانە ورىن العان كەزدەگى ۇيلەسىمدى ارەكەتىن باعالاۋ، سۋلى جانە تاۋلى اۋماقتاعى تاپسىرمالاردى ورىنداۋ بولىپ تابىلادى. تەك وسىنداي تەكسەرىس شارالارىنىڭ نەگىزىندە جاۋىنگەرلىك دايارلىقتىڭ دەڭگەيىن، جاۋىنگەرلىك ازىرلىكتىڭ جوعارى دەڭگەيىنە كەلتىرۋدەگى جانە بەلگىلەنگەن اۋماققا شوعىرلانۋداعى كومانديرلەر ءىس ارەكەتىنىڭ تيىمدىلىگىن ايقىنداۋعا بولادى.