«Bek Air» اۋەكومپانياسى ۇشاعىنىڭ اپپاتتى جاعدايدا قونۋىنا قاتىستى ءىس ق ر باس پروكۋراتۋراسىنىڭ ءجىتى باقىلاۋىندا،-دەپ حابارلايدى «قامشى» پورتالى قازاقپاراتقا سىلتەمە جاساپ.
«اتالعان فاكت سوت الدىنداعى تەرگەۋ امالدارىنىڭ ءبىرىڭعاي رەەسترىنە ق ر قك 344-بابىنىڭ 1-بولىمىنە سايكەس تىركەلدى. قىلمىستىق ءىس باس كولىك پروكۋراتۋراسىنىڭ ارنايى پروكۋرورلارىنىڭ وندىرىسىنە الىندى، سوتقا دەيىنگى تەرگەۋ امالدارى جۇرگىزىلىپ جاتىر»، - دەيدى ق ر باس كولىك پروكۋراتۋراسىنىڭ رەسمي وكىلى ادىلەت توقتامىسوۆ.
ايتا كەتەيىك، 27 ناۋرىز كۇنى «Bek Air» اۆياكومپانياسىنىڭ «فوككەر-100» ءتيپتى اۋە كەمەسى « قىزىلوردا-استانا» باعدارىمەن رەيس ورىنداۋى بارىسىندا ءشاسسيدىڭ الدىڭعى تىرەۋ تاعانىنىڭ ىستەن شىعۋىنا بايلانىستى اپاتتىق جاعدايدا جەرگە قونعان بولاتىن.
كەستە بويىنشا ۇشاق استاناعا 09.45-تە قونۋعا ءتيىس بولاتىن. الايدا شتاتتان تىس جاعدايدا ءورت شىعۋ ءقاۋپىن مەيلىنشە ازايتۋ قاجەت بولدى. وسىعان بايلانىستى ۇشاق اۋەدە قوسىمشا 50 مينۋتتاي ۋاقىت ۇشىپ ءجۇردى. وسى ۋاقىت ارالىعىندا استانا اۋەجايى ءورت بولۋ ءقاۋپىنىڭ الدىن الۋ ماقساتىندا ۇشۋ-قونۋ جولاعىن كوبىككە تولتىردى. قوسىمشا 7 ءورت تەحنيكاسى مەن 4 جەدەل جاردەم ماشيناسى ازىرلەندى.
ۇشاق 10.36 -دا قوندى. ۇشاق بورتىندا 116 جولاۋشى مەن 5 ەكيپاج مۇشەسى بولدى. جاپا شەككەندەر جوق.
اۋەجايدىڭ، قالانىڭ شۇعىل قىزمەتتەرىنىڭ ۇيلەسىمدى جۇمىسى مەن اۋە كەمەسى ەكيپاجىنىڭ جوعارى كاسىبيلىگىن اتاپ وتكەن ءجون.
قازىرگى ۋاقىتتا ق ر يدم ارنايى كوميسسياسى قۇرىلدى. زەرتتەۋ ناتيجەسى كەيىنىرەك حابارلاناتىن بولادى.
