«استانا ەكسپو-2017» ۇلتتىق كومپانياسىنىڭ بۇرىنعى باسشىسى ت. ەرمەگيايەۆتىڭ جۇرگىزۋشىسى ءارى وققاعارى بولعان سايات نادىربايەۆ بۇرىنعى باسشىسىنا قارسى كۋاللىك بەرگەن، - دەپ حابارلايدى «قامشى» پورتالى.

تەرگەۋ بارىسىندا كۇدىكتىلەردىڭ تەلەفونمەن اڭگىمەلەسۋلەرى مەن باسقا دا ماتەريالداردى جەمقورلىققا قارسى ءىس-قيمىل جونىندەگى ۇلتتىق بيۋرو اقپارات قۇرالدارىنا جاريالاپ وتىر.

جەمقورلىققا قارسى قىزمەت وكىلدەرىنە ت. ەرمەگيايەۆتىڭ قىلمىستىق سحەماسىن س. نادىربايەۆ وتكەن جىلدىڭ جازىندا-اق ايتىپ بەرگەن كورىنەدى. قارجى پوليسەيلەرى ەكسپو اينالاسىنداعى قىلمىستىق سحەمالاردىڭ ءبىرازىن وسى س. نادىربايەۆتىڭ مويىنداۋلارى ارقىلى انىقتاعان. الايدا، باسشىسىنا قارسى كۋالىك بەرگەن جۇرگىزۋشى كەيىن ۇشتى-كۇيلى جوعالىپ كەتەدى. س. نادىربايەۆ 28 ناۋرىز كۇنى الماتى قالاسىندا قايتادان قۇرىقتالدى. س. نادىربايەۆتىڭ كوزدەن تاسا بولۋىن تەرگەۋشىلەر كۇدىكتى ت. ەرمەگييەۆتىڭ ءىسى دەپ وتىر. ولاردىڭ ايتۋىنشا، س. نادىربايەۆتى نەگىزگى كۋاگەر رەتىندە كۇدىكتىنىڭ اكەسى امانگەلدى ەرمەگيايەۆ الماتىداعى تانىستارىنىڭ كومەگىمەن بىرنەشە اي بويى جاسىرىپ كەلگەن.

وسى ءىس بويىنشا س. نادىربايەۆ جانە ونى جاسىرۋدى ۇيىمداستىرعان ن. مولداشيەۆ پەن س. ەرەجەپ الماتى قالاسىنداعى ۋاقىتشا ۇستاۋ يزولياتورلارىنىڭ بىرىنە قامالدى.

ەستەرىڭىزگە سالساق، مەملەكەت قارجىسىن جىمقىردى دەگەن ايىپ تاعىلعان «استانا ەكسپو-2017» ۇلتتىق كومپانياسىنىڭ بۇرىنعى باسشىسى ت. ەرمەگيايەۆ پەن ونىڭ سىبايلاستارىنىڭ ءىسى بويىنشا سوت وتىرىستارى استانادا 18 ناۋرىزدا باستالعان بولاتىن. ولارعا 10 ميلليارد تەڭگەدەن استام مەملەكەت قارجىسىن جىمقىردى دەگەن ايىپ تاعىلدى.