ەكىنشى مارتە قازاقستان ءوز تاريحىندا بوكستان ەرلەر كومانداسىن وليمپيادا ويىندارىنا تولىق قۇرامدا جاساقتادى، ياعني ريوعا 10 سپورتشى اتتانادى، - دەپ حابارلايدى «قامشى»  پورتالى «قازاقپارتقا» سىلتەمە جاساپ.

ۇلتتىق وليمپيادا كوميتەتىنىڭ مالىمەتىنە سەنسەك، 1996 جىلى اتلانتاعا 8 بوكشى ەر-ازامات باردى، 2000 جىلى مەلبۋرندە - 7-ۋ، 2004 جىلى افينادا - 8، 2008 جىلى بەيجىڭدە - 10، 2012 جىلى لوندون وليمپياداسىنا - 9  ەر بوكسشىمىز قاتىستى.

قىتايدا وتكەن بوكستان ازيا جانە مۇحيت ايماعى ەلدەرى بويىنشا وليمپيادا ويىندارىنا جولداما بەرىلەتىن تۋرنيردە قازاقستان ريوداعى وليمپياداعا جەتى جولداما ۇتىپ الدى، ونىڭ ءبىرىن قىزىمىز - داريعا شاكىموۆا  (75 كەلى) يەلەندى، قالعان التاۋى ەرلەرگە تيەسىلى - ولجاس ساتتىبايەۆ (52 كەلى)، قايرات ەرالييەۆ (56 كەلى)، ابىلايحان ءجۇسىپوۆ (64 كەلى)، جانىبەك ءالىمحان ۇلى (75 كەلى)، ادىلبەك نيازىمبەتوۆ (81 كەلى)، يۆان دىچكو (+91 كەلى). 

بۇعان دەيىن 4 جولداما ۇتىپ الىنعان ەدى. دانيار ەلەۋسىنوۆ (69 كەلى) دوحادا وتكەن الەم بىرىنشىلىگىندە جەڭىپ الدى، ۆاسيليي ليەۆيت (90 كەلى) - WSB جوباسىندا، ءبىرجان جاقىپوۆ (49 كەلى) پەن  بەرىك ءابدىراحمانوۆتار (60 كەلى) -AIBA Pro-Boxing جوباسىندا ليسەنزياعا يە بولدى. 

وسىلايشا، قازاقستاننىڭ ەرلەردەن جاساقتالعان 10 بوكسشىسى مەن ريوعا اتتاناتىن كومانداسى تولىق جاساقتالدى.

قالعان 52 جانە 60 كەلىگە دەيىنگى سالماق دارەجەلەرىندەگى قىزداردىڭ جولداماسى بويىنشا ءالى دە مۇمكىندىك بار. 19-27 مامىردا استانادا بوكستان الەم بىرىنشىلىگى وتەدى. چەمپيوناتتا ءار سالماق دارەجەسىندە 4 جولدامادان ساراپقا سالىنادى.