ەلدەگى الاياقتىق قىلمىستاردىڭ تەڭ جارتىسى وڭتۇستىك قازاقستاندا جاسالادى، - دەپ حابارلايدى «قامشى» پورتالى TVK-عا سىلتەمە جاساپ.

تەك وسى اعىمداعى جىلدىڭ ەكى ايىندا وبلىستا 1148 ادام الاياقتاردىڭ قۇربانى بولعان. وبلىستىق پروكۋراتۋرانىڭ حابارلاۋىنشا، وڭىردەگى الاياقتىق وقيعالارىنىڭ سانى جىل سايىن 66 پايىزعا ارتىپ وتىرعان كورىنەدى.

وعان تومەندە كەلتىرىلگەن الاياقتىق قىلمىستار ستاتيستيكاسى دالەل بولا الادى:

2010 جىلى وبلىستىق ىشكى ىستەر دەپارتامەنتىندە وسى تاقىلەتتەس 744 قىلمىس؛

2011 جىلى – 1128 قىلمىس؛

2012 جىلى – 1761 قىلمىس؛

2013 جىلى – 3036 قىلمىس؛

2014 جىلى – 3730 قىلمىس؛

2015 جىلى – 5614 قىلمىس تىركەلگەن.

وسىلاردىڭ ىشىندە ەڭ كوپ تاراعاندارى قارىزعا اقشا الىپ قايتارماي كەتۋ، نەسيە راسىمدەۋ، جۇمىسقا تۇرعىزۋ، جەر تەلىمدەرىن راسىمدەۋگە بايلانىستى الاياقتىقتار كورىنەدى. ءتىپتى، مەملەكەتتىك قىزمەتكە تۇرۋدى كوزدەگەندەر دە وسىنداي الاياقتىقتىڭ قۇربانى بولىپ جاتادى ەكەن. پروكۋراتۋرا ماماندارى «بولماي قالعان مەمقىزمەتشىلەردىڭ» دە ەسەبىن جۇرگىزىپ قويىپتى. بيۋدجەتتىك مەكەمەگە قىزمەتكە تۇرام دەپ الدانعانداردىڭ جالپى سانى 146 بولسا، ونىڭ 10-ى ىشكى ىستەر ورگاندارىنا، 7ء-ۋى اسكەري بولىمدەرگە، 3-ەۋى توتەنشە جاعداي مەن سانيتارلىق قاداعالاۋ مەكەمەلەرىندەگى قىزمەتتەن دامەلىلەر بولعان كورىنەدى.

پروكۋرورلار ادامنىڭ ىشىندەگىسىن سەزىپ تۇراتىن الاياقتارعا كوبىنەسە قۇقىقتىق ءبىلىمى تومەن، الايدا، وڭاي بايۋ مەن جوعارى قىزمەتكە ورنالاسۋعا دەگەن قۇمارلىعى جوعارى ازاماتتار جەم بولاتىنىن ايتادى.

«2015 جىلى شىمكەنتتە كەزەكتى قارجى پيراميداسىنىڭ قىزمەتىنە توسقاۋىل قويىلدى. بۇل پيراميداعا قوسىلۋ ءۇشىن ادامدار 50 مىڭ تەڭگە وتكىزىپ، ارتىنان تاعى وسىنداي بەس ادام اكەلىپ قوسۋعا ءتيىس بولعان. ەگەر وسى شارت ورىندالسا، پرياميدا مۇشەسىنە 100 مىڭ تەڭگە اقشا بەرىلىپ كەلگەن»، - دەيدى وقو ءىىد تەرگەۋ باسقارماسىنىڭ باستىعى نۇريددين داۋىلبايەۆ.

وسىلايشا جوقتان بار جاساپ كەلگەن فيرمادان زارداپ شەككەن 18 ادام انىقتالىپ وتىر. پيراميدانىڭ ۇيىمداستىرۋشىسى ءقازىر تۇتقىندالىپ، تەرگەۋ جۇرگىزىلۋدە.

وتكەن جىلى تامىز ايىندا تاعى ءبىر الاياق سارىاعاش، قازىعۇرت، سوزاق اۋداندارىنىڭ حالقىن زار قاقساتقان. ەلدەن جۇمىسقا ورنالاستىرامىن دەگەن جەلەۋمەن اقشا الىپ، ءىزىن جاسىرىپ كەتىپ جۇرگەن 38 جاستاعى ازامات ورداباسى اۋدانىنىڭ پوليسەيلەرىنە ۇستالعان. ونىڭ كەيىن 2014 جىلدان بەرى وسىلاي ەلدى الداپ كەلگەنى انىقتالدى.

دۇكەن، بازارلاردا ەلدى اڭگىمەگە تارتىپ، ءوزىن ۋران وندىرەتىن كاسىپورىندا كادر ءبولىمىنىڭ باستىعىمىن دەپ تانىستىراتىن ول ەلدەن اقشا الىپ، اتى-جوندەرىن ءبىر «تىزىمگە» جازىپ اپ تايىپ وتىرعان. وسىلايشا ول 31 ادامنان جالپى قۇنى 3 ميلليون تەڭگەگە جۋىقتايتىن اقشا الىپ كەتكەن.

شىمكەنتتىك كەيبىر الاياقتاردىڭ ءىسى گوگولدىڭ «ريەۆيزورىن» ەرىكسىز ەسكە تۇسىرەدى. اقپان ايىندا قالادا وزدەرىن فارماسيەۆتيكالىق باقىلاۋ مەكەمەسىنىڭ قىزمەتكەرلەرىمىز دەپ تانىستىرعان جالعان تەكسەرۋشىلەر بىرنەشە ءدارىحاناعا باس سۇعىپ، اڭقاۋ ساتۋشىلاردان 30-دان 150 مىڭ تەڭگەگە دەيىن اقشا بوپسالاپ كەتكەن.

جالپى ەل بويىنشا كەڭ تاراعان تەلەفون ارقىلى الاياقتىق جاساۋ دەرەكتەرى دە وڭتۇستىكتە ءورشىپ تۇر ەكەن. «اكسيا! وتپراۆ سووبششەنيە نا نومەر XXXXXXX، ۋچاستۆۋي ۆ كونكۋرسە ي پولۋچي پوداروك…» دەگەن حابارلامالارعا الدانعان قانشاما جان تەلەفوندارىنان 200-300 تەڭگە اقشا ۇستالعانىن بىلگەننەن سوڭ بارىپ قانا ساندارىن سوققان كورىنەدى.

وقو ءىىد كريمينالدى پوليسيا ءبولىمىنىڭ باستىعى سەرىك شالقاروۆ وسىنداي الاياقتارعا الدانعانداردىڭ دەر كەزىندە قۇقىق قورعاۋ ورگاندارىنا دەر كەزىندە شاعىمدانباۋى قىلمىسكەرلەردى قۇرىقتاۋدى قيىنداتىپ وتىرعان كورىنەدى.