بۇگىن تاڭەرتەڭ اقمولا وبلىسى اتباسار اۋدانىندا ورنالاسقان جاباي وزەنى ارناسىنان اسىپ، سۋ  بوگەتى بۇزىلدى، - دەپ حابارلايدى «قامشى» پورتالى 24.kz-كە سىلتەمە جاساپ.

سالدارىنان جاقىن ماڭداعى ۇيلەردى سۋ باسۋ ءقاۋپى ءتوندى. وسىدان ءبىر كۇن بۇرىن 70-تەن اسا وتباسى مۇلكىمەن ءقاۋىپسىز جەرگە كوشىرىلگەن ەدى. ءبىراق بىرنەشە رەت جاسالعان ەسكەرتۋلەرگە قاراماستان ءبىرقاتار تۇرعىن كوشپەي قالعان. ەرىگەن سۋمەن 500-دەن استام قۇتقارۋشى مەن جەرگىلىكتى تۇرعىندار كۇرەسىپ جاتىر. كومەككە وڭتۇستىك قازاقستان وبلىسىنان توتەنشە جاعدايلار دەپارتامەنتىنىڭ قىزمەتكەرلەرى دە جۇمىلدىرىلۋدا.

ايتا كەتۋ كەرەك، اۋداندا تاسقىنعا قارسى شارالار جۇرگىزۋ ءۇشىن 80 ملن تەڭگەدەي قارجى قاراستىرىلعان. ءقازىر توپىراقتان ۇزىندىعى 4 شاقىرىم بولاتىن دۋال تۇرعىزىلىپ، وزەن بويىنا ينەرتتى ماتەريال سالىنعان 9 مىڭ قاپشىق قالاندى. قالا مەن اۋىل ماڭايلارىندا مۇنداي جۇمىستاردىڭ جۇرگىزىلۋى تەگىن ەمەس. ەكى جىل بۇرىن اتباسار قالاسىندا ءتىلسىز جاۋدان 529 ءۇي زارداپ شەگىپ، ونى قايتا قالىپقا كەلتىرۋ ءۇشىن 4 ملرد تەڭگەگە جۋىق قارجى كەتكەن ەدى.

نۇرجان قامباتىروۆ، اتباسار قالاسىنىڭ اكىمى:

- الەۋمەتتىك نىسانداردىڭ، №1 جانە №4 ورتا مەكتەپتەردىڭ ماڭى بەكىتىلدى. بۇل مەكەمەلەر تولىقتاي وقشاۋلاندى. سونىمەن قاتار، وزەن جاعاسىندا ورنالاسقان ۇيلەر دە نازاردان تىس قالعان جوق. قالا مەن زارەچنىي اۋىلىنا قاراي كەلەتىن وزەن ارناسى دا مىقتاپ بەكىتىلدى.