قازاقستان قارۋلى كۇشتەرى اقك اسكەري-اۋە كۇشتەرىنىڭ اۆياپاركى قازاقستان مەن اقش اراسىنداعى اسكەري-تەحنيكالىق ىنتىماقتاستىق جوسپارىنا سايكەس UH-1H-II «حيۋي» تىكۇشاعىمەن تولىقتى، - دەپ حابارلايدى «قامشى» پورتالى قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

بۇل اقىسىز نەگىزدەگى اسكەري-تەحنيكالىق ىنتىماقتاستىق شەڭبەرىندە جەتكىزىلەتىن ءۇشىنشى تىكۇشاق. تىكۇشاقتان باسقا، سونداي-اق قوسالقى بولىكتەر، اگرەگاتتار، جيناقتاۋشى جانە شىعىس ماتەريالدارى جەتكىزىلدى.

«حيۋي» تىكۇشاقتارى ءارتۇرلى وقۋ-جاتتىعۋلاردا، ونىڭ ىشىندە قازاقستاندىق «قازبات» بىتىمگەرشىلىك باتالونى مەن ق ر قك اەروۇتقىر اسكەرلەرى «قازبريگ» بىتىمگەرشىلىك بريگاداسىنىڭ ءىس-قيمىلدارى پىسىقتالاتىن «دالا قىرانى» تاكتيكالىق-ارنايى بىتىمگەرشىلىك وقۋ-جاتتىعۋلاردا كەڭىنەن قولدانىلادى. 

بۇدان بۇرىن 2006-2007 جىلدارى قازاقستاندىق ۇشۋ جانە ينجەنەرلىك-تەحنيكالىق قۇرامى اتالمىش تىكۇشاقتا تەوريالىق جانە پراكتيكالىق قايتا جاتتاۋدىڭ تولىق كۋرسىنان ءوتتى. 

«بۇل تىكۇشاقتار قاراپايىم جانە كۇردەلى مەتەوجاعدايلاردا، كۇندىز-تۇنى، جىل بويى پايدالانىلادى. پايدالانۋ كەزەڭىندە قانداي دا ءبىر ىستەن شىعۋ بولعان ەمەس، تەحنيكا سەنىمدى»، - دەيدى ااك قولباسشىسىنىڭ ورىنباسارى پولكوۆنيك ەركىن جۇماعالييەۆ.

UH-1H-II تىكۇشاعى – بۇل دەسانتتى (12 ادامعا دەيىن) جانە ءارتۇرلى جۇكتەردى تاسىمالداۋ، ىزدەستىرۋ-قۇتقارۋ جۇمىستارىن (ونىڭ ىشىندە جۇكشىعىرمەن) ورىنداۋ، اۋەدەن بارلاۋ، جارالىلاردى كوشىرۋ ءۇشىن ارنالعان Bell كومپانياسىنىڭ جەڭىل كوپ نىسانالى اسكەري-كولىكتىك تىكۇشاعى بولىپ تابىلادى. ونىڭ 1 800 جىلقىنىڭ كۇشىندەي قۋاتتىلىعى بار.  ت-53-L-703 ءبىر قوزعالتقىشپەن جابدىقتالعان، سونداي-اق ناۆيگاسيالىق جانە راديوەلەكتروندىق قوندىرعىنىڭ كەشەنىمەن جابدىقتالعان.  بارىنشا سالماعى – 4 762 كەلى، بارىنشا جىلدامدىعى – 240 كم/س. اۆياسيالىق پاركتىڭ كەزەكتى تىكۇشاقپەن تولىقتىرىلۋى ارميالىق اۆياسيا بولىمشەلەرىنىڭ تاپسىرمالاردى ورىنداۋ مۇمكىنشىلىكتەرىن ارتتىرۋعا مۇمكىندىك بەرەتىنىن ايتا كەتەيىك.